「紅磡接通港島超興奮」，羅同學再開金口唱出首本名曲，令全港都知道東鐵過海段喺上周日通車！就算你唔係鐵路迷，都可以趁新線路開通，遊車河兼打卡，一樣可以好興奮，尤其是這九個必影位，你自拍再放上網，呃Like一流。

「呢幾舊嘢唔係幾明係咩嚟。」可能現場經過、或者你就咁睇相，都會有呢個疑問。根據港鐵早前嘅介紹：設於紅磡站新東鐵月台的車站藝術品，叫做《失而復得》，係由藝術家林嵐創作，與置於車站對上一層屯馬線月台嘅藝術品一樣，用石雕去展現不同年代嘅行李，同埋經典尼龍袋嘅圖案。

會展站係唯一一個過海段嘅新站，所以特別多新嘢影。落咗車，梗係要影會展站個牌啦，綠綠地又加少少灰色嘅馬賽克，港鐵話綠搭灰係象徵維港海水顏色喎，綠色亦都係會展站嘅主體顏色，配搭灰色係想車站睇落唔會太深沉，感覺光鮮、光猛。

呢兩個彈殼係最多人影相嘅地方，新聞話通車首日，呢度聚咗幾百人打卡，非常誇張。彈殼後邊圖文並茂講番佢哋係咩嚟，同埋「出土」嘅過程，港鐵話兩個彈殼已經清潔好晒，大家除咗影相仲可以摸吓佢哋。

呢幅睇落又藍又灰嘅牆，叫《水記憶》，出自本地攝影藝術家梁志和，佢花咗一年時間，喺唔同時段、季節、天氣，喺灣仔碼頭影住維港海水，靈活運用色彩同埋光暗，展現維港唔同嘅面貌，夾埋影咗8000多張，再揀出1200張砌成特色牆。另外呢幅牆喺面向維港，亦代表向北，港鐵話車站令人唔知方向，今次就用呢幅牆話你知北邊喺邊，增加咗有趣性。

原來東鐵線已經有超過100年歷史，由1910年10月1日開始投入運作，由九龍去羅湖，經個一世紀擴充，車站由最初7個加到16個，仲終於伸埋過去香港島。呢100多年東鐵嘅重要時刻，你都可以喺「東鐵線超越一百年，邁向下一個世紀！」歷史圖片展睇番。

箭嘴都係打卡位？留心睇，箭嘴係有入冇出，估計係綠色箭嘴方向錯咗，應該係指出面，俾車內乘客跟呢個方向離開車箱。網民係開車第一日睇到呢個穿崩位，唔知而家有冇修正咗了。

去到金鐘，由於係首個四線匯聚嘅超級轉車站，呢度電梯都特別多，6層夾埋就有45條，更加有一條橫跨四層，方便你由過海月台直達上地面，唔知全程要搭幾耐呢？搭電梯除咗可以碌手機，大家不妨向上望…

…因為金鐘站最頂又有一個藝術品，名叫《引領前行》，由美國藝術家Talley Fisher創作，概念嚟自港鐵路線圖，懸浮雕塑象徵匯聚喺金鐘站嘅四條鐵路線。

行出車站，去埋最後一個打卡位，就係E出口嘅大型天窗。佢嘅作用，係將戶外嘅天然光，引入地下各層車站，令站內更明亮及開揚，不過有網民話咁嘅顏色、咁嘅型狀，似古墓咁喎。

總結：雖然只係加多一個新站，不過呢段過海嘅「沙中線」，起咗好耐亦都用咗好多錢，大家可以去睇吓係唔係物有所值。另外百年圖片展都值得去睇，應該會勾起大家唔少童年回憶。