揭開禁區神秘面紗 沙頭角一日遊必去六大景點

以前入沙頭角,又遠又要拎禁區紙,非常麻煩,不過由6月18日開始,你就可以跟旅行團踩入呢個禁區,揭開佢嘅神秘面紗。雖然唔係開放整個沙頭角,但都有幾個景點值得睇,加上可以去埋附近兩個小島—鴨洲及吉澳,佢地都係世界地質公園熱門地點,風景夠特別,所以沙頭角本地團位非常搶手,等小編介紹點樣報名同埋六個必去景點喇。

1. 一定要跟團去 團費300至500蚊

為配合《北部都會區發展策略方向》,政府於6月3日起將屬於邊界禁區嘅沙頭角碼頭,開放俾旅行團進入,仲想藉此推動沙頭角及新界東北旅遊發展,並推廣當區地道文化。呢個屬於試驗計劃,為期六個月,可能之後會擴大範圍,亦可能冇得再去,所以大家想睇吓沙頭角咩樣,就要好好把握機會啦。試驗計劃亦容許旅行團,喺碼頭搭船往荔枝窩、鴨洲、吉澳等附近景點遊覽,大大縮減所需時間,因為由沙頭角碼頭坐船去鴨洲、吉澳只需20分鐘,而家由馬料水坐船去鴨洲、吉澳係要90至105分鐘。

如果你想參加沙頭角本地團,可以點擊香港旅遊業議會官網,佢列咗所有旅行社嘅沙頭角旅行團,但係非常搶手,小編前幾日睇過,得番7月17、31同埋8月中之後出發嘅。小編建議大家bookmark定旅行社嘅官方facebook專頁,如果佢哋有新團推出,可以立刻留咗名先。唔同旅行社有唔同行程,雖然大家都必須去荔枝窩,有些團就去吉澳、有些就去鴨洲,然後「途經」某些景點,大家一定要睇清楚字眼啊!每位團費介乎300至500蚊,多數都包一餐午飯,大家都要自備足夠嘅水呢。另外,參加者需符合衞生防疫要求,包括滿足「疫苗通行證」的最新規定、快速抗原測試要陰性、掃安心出行等等。

要留意,就算你係團友,都只係俾你去沙頭角碼頭及附近一帶,其他禁區係仍然唔俾行入去。現場會有保安人員維持秩序,確保旅客不會越過指定的活動範圍,入禁區係犯法嘅,大家去到一定要遵從保安人員指示啊。

2.香港最長嘅碼頭—沙頭角碼頭

雖然首階段只係開放沙頭角一少部份,但香港最長嘅碼頭就係沙頭角碼頭,又新整咗幾個打位點,都值得去睇吓影吓相,另外荔枝窩、鴨洲、吉澳嘅風景都啱哂打卡呃like,連香港旅遊發展局都推介呢幾個必去景點。

首先係沙頭角碼頭,佢係全港最長嘅碼頭,全長280米,初建於1960年代,然後2004年重建,距離吉澳及鴨洲只有20至30分鐘船程。由於沙頭角海域一帶水淺,船隻難以停泊,只好將碼頭起長啲,等佢延伸至水深的位置。碼頭附近有有三幅充滿特色嘅壁畫,係畫家、居民、小學生及義工合力完成,展示沙頭角一帶街道、傳統習俗與客家文化。

3 仿中英街界碑 + 沙頭角之角

碼頭不遠就係「沙頭角之角」—呢度亦係沙頭角最東嘅一點,你只要沿著海濱往東面行,就會睇到一塊展示咗該處經緯度嘅座標牌,同埋以1:1比例複製的中英街界碑嘅展品,及在海平面上特別醒目的海上藍桶陣。呢塊界碑寫上「日出沙頭,月懸海角」,相傳係清朝一名大臣到沙頭角視察嘅時候,因為晨曦太陽正徐徐升起,但月亮仍未落山、懸掛喺西邊的海角,佢就詩意大發,講咗呢句「日出沙頭,月懸海角」,自此呢度就叫沙頭角。

碼頭一帶嘅欄杆,掛咗一條又一條嘅「幸福木小魚」,大概係想做出歐洲「愛情鎖」嘅效果,遊客可以向攤戶買木小魚,然後寫上自己嘅心意及願望。附近有一座製作印章機器,你只要用力一壓,就可以係小冊子「給」一個沙頭角印章留為記念。

4. 停車場變市集賣地道小食

平時用作居民喺停車場,當有旅行團到訪嘅日子,就變身為小型市集,擺咗16個小攤檔,售賣居民自製的土產海味、食品及小工藝品,例如售賣如茶果、腰果、海味、藥材,以及檔主用心製作的工藝品等。市集左邊,你會見到一個仿製嘅「沙頭角火車站」,旁邊有文字介紹孔嶺站遺蹟。原來沙頭角100年前,曾經有條鐵路,俾蒸氣火車行走,不過沙頭角公路於1927年通車後,呢條鐵路就停駛咗,而孔嶺站係鐵路唯一尚存嘅建築物,被列為香港三級歷史建築,展示咗當時實用主義呧建築特色。

5. 鴨洲、吉澳睇奇岩怪石

鴨洲因形似鴨子而得名,有天然的地質奇觀,更獲納入印洲塘特別地區及香港聯合國教科文組織世界地質公園範圍。島上引人入勝的地質美景,包括於香港十分罕見的褐紅色角礫岩,及位於島北的奇趣「鴨眼」海蝕拱,十分值得大家親身到場一覽其風貌。吉澳因其獨特地形,是漁船的優良避風港,而被視為吉祥的海灣,因而得名。你可以在假日與親朋好友在島上的吉澳文化徑漫步,一邊欣賞印洲塘的美好風光,一邊了解島上的人文歷史。大家亦可與情人在前往吉澳故事館的途中拜訪姻緣樹,從落下的樹葉中獲得祝福。

金巴利臣

一得閒就會四圍八,搵平嘢、搵好,就算花時間都係值得。