身份證有「45」字享半價
海洋公園周四重開門票預約方法一覽
政府宣布由4月21日起逐步放寬社交距離措施，包括大家好耐冇去嘅主題樂園，其中，海洋公園日前公布會喺果日重開，園內多處新添奪目裝置同特備節目，並推出一連串優惠同活動慶祝開業45周年。不過，所有訪客進入園區前均須於網上預約到訪日期，只要香港身份證號碼有「45」，即可獲門票半價優惠，成人門票只需 $180！
「願望之池」「虎旺祈園」等嶄新面貌：
海洋公園關閉多時，園內多處已準備好多項奪目裝置同特備節目，等你哋一家大小同親朋好友再次享受大自然樂趣同走訪動物大使。園方建議訪客不妨先到夢幻水都充滿春日氣氛嘅「願望之池」，為家人朋友送上健康祝福，然後喺海濱樂園廣場「虎旺祈園」六米高充氣巨型老虎旁邊擺個醒神甫士，再到園內其他多個相位盡情打卡。想令精神倍感振奮，可敲響大鼓打出強勁節奏，帶動周遭氣氛升溫。情侶們則定必要前往「高峰樂園」，喺掛滿情人鎖嘅桃花路上牽手漫步。
「與動物親上加親」活動：
掛住一眾動物大使嘅大小朋友就萬勿錯過一系列「與動物親上加親」活動，包括由 2022 年 4 月 22 日起 ，於海洋奇觀全新推出嘅「餵飼珊瑚魚」活動。小朋友亦可到多媒體互動體驗館「探索號 R」挑戰自我，同時探索大自然。訪客只需於「探索號 R」拍照並把相片上載到 Instagram 或 Facebook ，標註海洋公園官方社交媒體帳號，即可把探索時間增長 15 分鐘，盡享一小時多元化互動玩樂體驗。
星夜高峰Glamping強勢回歸：
若然意猶未盡，可以喺 2022 年 4 月 21 至 5 月 22 日期間參加大受歡迎嘅「星夜高峰Glamping」，享受環抱自然美景的度假體驗，營地內之空調私人帳篷、休息設備同淋浴設施一應俱全，晚餐於「爐炭燒」享用泰式炭烤美食，早上則在灣景餐廳慢嘆豐富早餐。另有觀賞日出、夜遊「南極奇觀」及「海獅見面會」等。喺星空下享受醉人時光，又可近距離與水豚、金剛鸚鵡同海獅見面，並喺入黑後到「南極奇觀」一探企鵝們嘅夜間活動，以及專享其他行程上嘅精彩活動。新一輪嘅「星夜高峰Glamping」將於 4 月 14 日下午 6 時起接受報名，即刻約定好友參加。
6月30日前推3大優惠：
海洋公園指會由 4 月 21 日恢復營運，每周開放 6 天，星期二除外。接受網上預約入園及發售優惠門票，優惠包括以下3項，均適用於2022年4月21日至6月30日：
【全日優惠套票】
推出全日優惠套票，成人門票$360、小童門票$216，可全日在山下海濱樂園和山上高峰樂園遊玩，同時可獲贈$30電子購物現金券。
【45周年生日優惠：半價】
香港身份證號碼有「45」兩個數字順序連續排列，即可享門票半價優惠，並獲贈$30電子購物現金券。（成人$180，小童$108）
【45周年生日優惠：8折】
香港身份證號碼有「4」或「5」字出現則可享門票8折優惠，並獲贈$30電子購物現金券。（成人$288，小童$173）
海洋公園官方網站按此
