透心涼甜品健康又美味
親子食譜同小朋友DIY夏日消暑甜品
今年四月政府要學生提早放暑假，不過，好多學校喺嚟緊九月新學期開始之前都仲有約一至兩個星期「真暑假」。家長們一於同仔女盡情享受親子時光，喺屋企合力炮製夏日消暑甜品對抗炎夏，以下五款透心涼甜品健康又美味，做法簡單，最啱家長陪同小朋友一齊發揮創意DIY製作。
1. 香濃芒果椰汁奶凍
食甜品好多人都諗起芒果，貪佢有一股濃郁香氣，七月街市超市有最靚當造嘅台灣愛文芒果同金煌芒果，日本就有宮崎芒，隻隻酸甜香口，用嚟做夏日消暑甜品最啱。加上芒果向來有「熱帶水果之王」美譽，含有豐富維他命 A、維他命 C 同鉀，小朋友食幾杯香芒椰奶凍都唔怕！
材料：
牛奶 400g
椰漿 210g
鮮奶油 35g
魚膠片 13g
糖 30g
芒果 1-2個
椰絲 適量
做法：
i. 魚膠片泡涼水浸軟備用。
ii. 將椰奶凍材料倒入大碗中拌勻後倒入鍋裏小火煮至溫熱，再關火放入已經泡軟的魚膠片，待完全溶化後放一旁冷卻。
iii. 將椰奶倒入布丁杯中然後蓋上蓋子放入雪櫃冷藏一晚。
iv. 預備一個大芒果起肉然後放在已經凝固的椰奶凍面，再灑一點椰絲就完成。
2. 鮮果乳酪雪條
小朋友要食得有營？好多家長都會以乳酪取代雪糕，原因係乳酪能提供益生菌，有助增強孩子嘅抵抗力同保持腸道健康。用乳酪嚟整鮮果乳酪雪條就最啱，藍莓有助眼睛視力保健，奇異果營養價值高，士多啤梨酸中帶甜，開胃可口，再加入蘋果汁在乳酪中，容易入口亦唔會過甜，反覆有酸酸甜甜嘅感覺，小朋友唔怕因為食生冷嘢會咳，仲好健康，日日一支都冇問題！
材料：
純味乳酪 1杯
蘋果汁 1杯
蜜糖 1湯匙
藍莓 1/2杯
士多啤梨 3粒
奇異果 半個
做法：
i. 把藍莓和奇異果洗淨，奇異果切片，士多啤梨去蒂後切粒。
ii. 乳酪加入蘋果汁及蜜糖後拌勻，把藍莓、奇異果及士多啤梨放入雪條模中。
iii. 最後把拌好的乳酪放在雪條模內，放入冰格約四小時完成。
3. 蜜糖木糠布甸
好多小朋友都鍾意食布甸，蜜糖木糠布甸簡單易整，如果有疫情食剩嘅消化餅，雪櫃又有淡忌廉，已經可以整到美味蜜糖嘅蜜糖木糠布甸，冷藏兩小時或以上即可享用，奶香幼滑，冰凍可口，保證囝女有零失敗入廚體驗。
材料：
消化餅 5塊
淡忌廉 180克
煉奶 10克
蜜糖 2湯匙
做法：
i. 將消化餅放進保鮮袋，盡量壓碎。
ii. 將煉奶和淡忌廉混合，打發至約七成企身。
iii. 取出少量忌廉混合物，與蜜糖輕輕拌勻。
iv. 把拌勻的混合物倒進剩餘的忌廉中，再輕輕拌勻。
v. 將忌廉及消化餅碎逐層放入小杯中，冷藏兩小時或以上即可。
4. 迷你一口泡芙
迷你一口泡芙，中間唧入忌廉，放落雪櫃，食嘅時候稍為放軟，食落裡面似雪糕，簡單易整又係一個方便小食，小朋友一粒一啖，食到停唔到手！
材料：
水 250g
低筋粉 175g
無鹽牛油 120g
全蛋 5隻
做法：
i. 先將水及牛油放入煲內煮至牛油完全溶化微滾就可以(小火)
ii. 放入已篩麵粉拌勻(其間不用關火)
iii. 拌勻後略煮大約3分鐘，要不停攪拌
iv. 熄火，放至微暖始開始放蛋(太熱蛋會熟) 蛋要續隻放入，每入一隻蛋都要快手拌至均勻
v. 入好蛋後就可以入唧袋，每粉唧約 3cm，放入已預熱焗爐 200 度，焗 15-20 分鐘就可以
vi. 完成後泡芙取出放涼，底部拮一小孔方便唧入忌廉，雪 2-3小時便可
5. 士多啤梨乳酪沙冰
夏日炎炎，唔想小朋友飲咁多汔水？盒裝果汁又怕太甜？不如自己整士多啤梨乳酪沙冰，呢款特飲以士多啤梨為主，士多啤梨有豐富維他命 C，可以增強抵抗力，保持身體健康。
材料：
士多啤梨 100克
橙一個 / 橙汁 150毫升
乳酪 100克
亞麻籽 一湯匙
做法：
i. 士多啤梨在水中洗乾淨。，再加入一茶匙白醋，在水中浸10分鐘。
ii. 將士多啤梨的水份抹乾，放入冰箱冷藏大約5小時，直至結冰。
iii. 搾橙汁，或可用現成橙汁代替。
iv. 將士多啤梨柄去掉。
v. 將所有材料放入攪拌機，打至順滑，即可飲用。
