康文署3月17日開始關閉轄下泳灘,歷時差唔多兩個月,5月5日終於解禁啦!雖然嗰日唔係公眾假期,但新聞所見熱門沙灘已經人頭湧湧,小編估計星期六日同埋佛誕假期,一定會仲迫人囉!如果你唔想同人迫,可以考慮小編推介呢5個隱世沙灘,俾你靜靜哋一個人或者幾個朋友,曬吓太陽玩吓水,舒舒服服咁過一日。

1. 小欖沙灘

不過未推介之前,容許小編語重心長咁講一次:沙灘重開、游水唔駛戴口罩,但其他時間係要㗎,口罩令、限聚令冇話沙灘豁免。所以大家喺沙灘曬太陽、同朋友吹水、影吓海邊綺麗風景嘅時候,記得戴返個口罩,同埋最多四個人圍埋坐咋。

另外,暫時只有15個康文署管理泳灘,朝9夜6有救生員當值,佢地係:深水灣、洪聖爺灣、麗都灣、清水灣二灘、蝴蝶灣、淺水灣、銀礦灣、更生灣、銀線灣、黃金泳灘、石澳、貝澳、馬灣東灣、廈門灣、大埔龍尾。至於其他泳灘嘅救生員服務繼續暫停,康文署提醒市民,切勿喺冇救生員當值嘅泳灘游泳,大家要小心安全。

可以入番正題,第一個要介紹,係位於屯門的小欖沙灘。小編覺得熱門沙灘最大問題,唔係人多而係車多!如果你渣車去赤柱、淺水灣一帶沙灘,都幾難搵到泊位,而呢個小欖沙灘就冇呢個煩惱,因為你可以隊部車入去沙灘,亦因為咁佢成為熱門嘅「車中泊」露營地點。路線如下:屯門公路(9號幹線)出口22去小欖,行到青山公路「懲教署職員宿舍」迴旋處後,第一個路口轉左後,再跟住轉右,進入澄麗路第一個路口轉右,途經爛地路,再行前小小就係小欖海灘。你可以將部車泊喺第一塊爛地,又或者再行樹林最左邊沙路,再行前入沙灘。

小欖沙灘唔算太長,200米左右啦,沙質都算白滑,而且呢度係出名的摸蜆聖地,當潮退後就有一大片泥灘,你就可以去掘蜆甚至有蝦出沒。另外呢度睇到日落,當太陽慢慢沉入右邊白色的青麗灣別墅,碧海藍天再加矮矮的白屋,你仲可以幻想自己去咗希臘愛琴海,吹住海風睇日頭,都幾浪漫㗎。不過呢度多蜆,自然都多蜆殼,所以著沙灘拖比較穩陣,玩完沙可以去附近的BBQ場簡單地沖吓身,不過垃圾就要自己帶走啦。

交通:旺角港鐵站C出口,朗豪坊側,搭紅色小巴,於小欖警察宿舍落車;於荃灣西鐵站乘專線小巴141號,於小欖警察宿舍落車
設施:鄰近大型燒烤場,提供BBQ任食,自來水,及各項免費或收費康樂設施,如沙灘排球、單車、風箏等。

2. 白水碗沙灘

講起西貢隱世沙灘,好多人會諗起萬宜水庫附近的浪茄、或者再遠少少—大浪的鹹田、東灣等,不過呢堆沙灘未到之前,都要你行一段山路,真係少啲體力都去唔到!其實西貢仲有一個隱世沙灘,而且唔駛消耗體力,由科技大學出發步行半個鐘就可達,佢就係白水碗沙灘。

你可以喺科技大學巴士站落車,轉入車站後面位置,根據指往「清新地」的指示牌進入石屎小徑,沿梯級向下行,經過農莊入口,再繼續沿石屎小路步行,就去到白水碗沙灘。途中你會見到白水碗飛瀑,呢條係全港數一數二長嘅瀑布,足足長45米,俾你感受咩叫氣勢磅礡,仲帶俾你絲絲涼意。白水碗海灘堪稱水清沙幼又白,可飽覽西貢海域景色,加上有清新地帶點歐式嘅建築,俾到你少少去咗沖繩感覺㗎。因為少人,呢度你可以放鬆成個人,吹吓風影吓相,當然仲睇到日落啦。另外沙灘後方、清新地農莊前有一條純白小橋,木質地版加上純白欄杆,好有歐式庭園風格,而且小白橋位於湖泊上邊,你影相技術夠好,就可以喺白橋影到天空之鏡。不過沙灘較多碎石,最好著番對沙灘拖走先好散步。

交通:乘搭91或91M號巴士,於科技大學站落車;於坑口港鐡站乘11M小巴或於寶林港鐡站乘12號小巴,亦係科技大學下車。
設施:清新地有機悠閒莊園,有荷蘭式風車、歐陸風打卡位,以及兒童玩樂設施,如樹下鞦韆、平衡木、沙池、繩網區等,但需事先預約。

3. 南灣沙灘

至於港島沙灘,南邊嘅淺水灣、赤柱一帶長期迫爆,但當中竟然有一個好少人去嘅,佢就係南灣泳灘。佢其實喺淺水灣隔離,位於港島南區舂坎角西北部,沿住南灣道行到盡頭就係,可能因為冇巴士直達,所以大家集中晒淺水灣吧。由此知名度不及其他港島南沙灘,遊人較少而且多外藉人士,係一個度過悠閒假日好地方。另外,佢係政府轄下公眾泳灘,有快餐亭、淋浴等基本設施,而且水質全年級別維持「良好」,水清沙幼,游水一流。另外呢度仲有水上活動玩,例如直立板瑜伽、獨木舟等,建議先網上報名(Explorer Hong Kong網站)以免白行一轉。

交通:巴士6、6A、6X、73、260、973、63、65、66,於赫蘭道下車,步行約10分鐘。
設施:餐廳、快餐亭、更衣室、淋浴設備、洗手間、浮台、遊樂場和沙灘排球場

4. 三星灣泳灘

西貢另一個冇咁多人嘅海灘,可以選擇三星灣,因為要搭船先去到!前往最佳方法,係先去鑽石山港鐵站,之後搭92號巴士到白沙灣碼頭,再轉乘街渡,船程約15分鐘。如果你想行下山之後游埋水,就可以去西貢的對面海邨,出發行山入三星灣,大概1.5小時行程。由於冇車直達,所以雖然三星灣已被廣泛介紹,但到訪人數仍遠遠比唔上大浪四灣、清水灣、銀線灣等。

三星灣沙灘唔算大,不過水質一直位於第一級,出名水清見底、沙質幼細,因此吸引唔少人專程游水甚至玩浮潛,當然都係影藍天碧海嘅好地方。另外,佢有康文署管理,所以設備好完善,有齊淋浴、更衣室、浮台、小食亭等,除咗補給飲品雪榚,仲可以租埋太陽傘。另外呢度有燒烤場,不過野食就要自己帶入去,或者你試下去另一邊岩石比較多嘅位置,釣魚、捉蝦然後直接燒吧。

交通: 在西貢巴士總站乘搭街渡前往
設施: 小食亭、燒烤爐、更衣室、淋浴設備、洗手間和遊樂場

5. 馬灣東灣泳灘

最後要介紹馬灣嘅東灣泳灘,佢位於挪亞方舟主題公園旁邊,睇到青馬大橋以及汀九橋,於是你下午就玩水、曬太陽、野餐,黃昏就睇到日落同埋亮燈的大橋景色,瘋狂打卡,愜意地過一日。雖然泳灘近年水質全年級別大多只維持於「一般」,但由於來往市區交通方便,所以假日都算多人。馬灣東灣泳灘除了具備基本設施,附近亦設有餐廳、超市及便利店,方便隨時補給飲食需求,如有需要亦可到達後才購買沙灘𥱊及防曬用品。

交通:乘搭往馬灣方向NR330、NR331、NR332號巴士,於珀麗灣下車;於中環2號碼頭乘搭往珀麗灣方向渡輪。
設施:更衣室、淋浴設備和洗手間

金巴利臣

一得閒就會四圍八,搵平嘢、搵好,就算花時間都係值得。