![](https://good2share.app/wp-content/uploads/2022/11/%E8%B2%B7%E5%8B%9E%E5%8A%9B%E5%A3%AB%E6%94%BB%E7%95%A5%EF%BC%9A%E6%B0%B4%E8%B2%A8%E7%9C%9F%E5%81%87%E6%95%99%E5%AD%B8%EF%BC%8B%E5%85%A5AD%E8%B2%B7%E5%85%AC%E5%83%B9%E6%AD%A3%E8%B2%A8Rolex%E8%B2%BC%E5%A3%AB-uai-480x251.jpg)
買勞力士攻略:水貨真假教學+入AD買公價正貨Rolex貼士
買勞力士攻略!唔少年青人儲起十多廿萬,都想入手名錶。名錶唔止可以戴出貴氣,仲可以保值。部分具有升值潛力嘅名錶,戴完之後放出去,仲有錢賺,而第一隻入手而又最穩陣嘅,梗係Rolex勞力士啦。喺今篇,小編會同大家講吓,初哥買勞要注意乜,點先買到正貨,同點用正價買到!
3大Rolex防偽特徵 睇出勞力士錶真偽
Rolex有保值之王嘅美譽,無論係一手定二手,都交易頻繁,假貨自然應運而生。小編假設大家唔喺「勞力士特約零售商」度買,咁大家又點去分勞力士真假呢?
Rolex錶防偽特徵1:防偽內圈
![](https://good2share.app/wp-content/uploads/2022/11/P1-rolex內圈.jpg)
Rolex內圈鐫刻咗重複循環嘅”ROLEX”字樣。喺6點位,每隻錶更有獨一無二編號(Watch number)。哩個編號同保卡上嘅編號係一樣嘅。
Rolex錶防偽特徵2:錶面玻璃有皇冠
2002年起製作嘅所有勞力士手錶,喺6點鐘位置嘅玻璃鏡面上,都搵到由微小雷射刻蝕製成嘅防偽皇冠標誌。
Rolex錶防偽特徵3:保養卡有NFC及水印
上文講到保養卡有勞力士錶嘅Model number同該隻Rolex錶嘅編號,而卡本身亦有防偽特徵。自2020年開始,Rolex轉用新保卡,除咗同舊卡一樣,喺紫外光下有role字樣水印之外,新卡仲加上NFC(Near-field communication)即近場通訊功能,只要將手提電話放近張卡,電話就會彈出選項,帶你去勞力士官網。
![](https://good2share.app/wp-content/uploads/2022/11/P3-rolex-new-card.jpg)
![](https://good2share.app/wp-content/uploads/2022/11/P4-rolex-old-card.jpg)
4大方法 買勞力士手錶正貨
香港有好多勞力士特約零售商(Official Rolex Dealer,行內一般叫AD),大家只要去勞力士官網,就可以查到。雖然有傳香港係全球勞力士派貨最多嘅地方,但因為勞力士特約零售商賣錶俾客人,只可以用公價或低於公價發售,所以好多AD只會將熱門嘅勞力士錶款留俾熟客或VIP客,街客都唔係易買到。咁想買,點好?可以參考以下4招;
買勞力士手錶最平方法:排隊買勞
想用正價買勞力士手錶,除咗本身要識AD高層或老細,最平嘅方法就係排隊,你入到去同職員講,想留名排隊買咩勞力士手錶,通常職員會拎本簿出嚟同你Mark低佢。不過,哩個方法令你買到錶嘅機會係好微。網上留傳話要排幾年,亦有人話拎住卡片去排隊會更易。
買勞力士手錶最易方法:食骨配貨
同買Hermes袋一樣,用公價買名錶最易嘅方法就係配貨,即係你買熱門款嘅同時要買啲普通款(指喺市場上無炒價嘅Rolex錶)。通常買一隻較貴嘅普通款Rolex手錶,你都可以買多隻熱門款Rolex名錶。當然,唔係間間錶舖都咁做。
買勞力士手錶最需運氣方法:旅行買Rolex
歐洲可以話係買勞力士嘅熱門地方,特別係好多國家都有銷售稅。雖然港人去買,有得退稅,但計埋同喺香港公價買差唔多。如果想試,大家可以旅行出發前,用VPN去當地國家嘅勞力士官網,查吓當地特約零售商地址,順便去望望。夠運嘅話,真係可以買到。小編親身試過,係真係得㗎。
買勞力士手錶最快方法:食炒價
香港無銷售稅,所以名錶交易喺香港都幾旺吓。即係話香港除咗行貨多,水貨都多,大把街舖都會賣「炒價錶」,想知自己買到嘅係咪正貨,就要睇上文啦。
買勞力士攻略及注意事項
1.想公價買勞力士錶 先要顯實力
小編留意名錶同手袋好多年,發現如果大家想直接行入舖到用公價買錶,重點係要俾職員覺得你係有能力買,而且並唔止買一次,而係會有下次。所以,衣著真係好重要。
2.真實用家成功買Rolex機會大
勞力士特約零售商只可以用公價賣錶。據講因為勞力士想賣錶俾喜歡戴錶嘅真正用家,但Rolex因為有炒賣市場,好多投資者都會假扮自用。所以,想俾店員知道你係自用,你可以即場叫店員改錶帶(因為改錶拆帶會整花少少,如果自用就唔怕),咁就增加可以用公價買勞力士錶嘅機會喇。
![](https://good2share.app/wp-content/uploads/2020/04/pretty-150x150.jpg)
樂選講者
有完美主義的師奶,喜歡東揀西揀搵最平靚正嘅事物,由投資、文藝到生活用品,都喜歡花時間去研究一番,認真的為自己選擇最適合自己每一人、事、物,亦樂意用文字與人分享心。
熱門文章
最新文章
立即分享!
相關文章
必買丨7款一看即想入手的有趣商品 日本必買 香港必買 創意商品
2024 年 8 月 29 日
中秋水果2024丨中秋送禮生果大比拚 附參考價 日本蘋果 台灣文旦 泰國紅鑽柚
2024 年 8 月 20 日
低糖月餅2024丨月餅我行先 5家健康月餅價格、送貨及 低糖月餅卡路里、食用安全等常見問題
2024 年 7 月 19 日