名錶價格大跌? 勞力士綠水鬼、熊貓、Loki賣幾錢?

「勞力士無止境」，小編一向都對名錶有濃厚興趣，今次先同大家講吓最為港人熟悉嘅勞力士!
話說自2015年開始，勞力士嘅運動款就由可以行入Authorized dealer shop用公價買到，喺水貨買仲有折，一路升到今年3月，呢6、7年以嚟，勞力士公價升，炒價更升到天價，但係3月因為疫情封關等因素，炒價突然崩塌，究竟嚟到8月，錶價有無升返呢? 最熱門嗰幾隻做緊幾錢呢? 未來似會係升定跌呢? 

開估：升定跌？

跌，對比起今年３月而家仲係跌，但係有回升跡象。

以綠水鬼( 錶號:126610LV)為例，公價$82800，3月升穿20萬，一路跌去7月最低見約13萬頭，到去8月少少回升返去14萬中。

熊貓(116500LN white)又點呢?

由今年3月高位43萬以上，直插至而家27、28萬左右，暫時呢隻大熊貓嘅價錢未有上返去，不過都仲係比公價$113000，貴左一倍有多。

Loki (126508 green) ：跌完又升返

內地叫做綠迪、外國叫Loki( 因為配色又金又綠似哂洛基形象) 嘅全金地通拿，一出已經大受歡迎，公價$293,300，今年3月約95萬，上個月去到65萬，今個月又上返去近70萬喇。

(全金綠面地通拿係咪都真係有Loki Feel呢? )

未來趨勢?

由3款可以話最熱門嘅勞力士嚟講，可以見到有傾向係已經到左谷底，但都無大升返上去。始終買賣都係講供求，股、樓、幣市都未升返，經濟又下行，對奢侈品嘅需求都會有所限制。而且，喺玄學嚟講，2024年進入九紫離火運，即係火氣大旺，火剋金，屬金嘅錶業似乎無咩運行。

  (免責聲明：本文內容並非投資意見，亦不構成任何投資產品之要約、要約招攬或建議。本資料只作為一般用途，它並沒有考慮您的個人需要、投資目標及特定財政狀況。投資附帶風險。若有任何疑問，請諮詢獨立財務及有關專家的意見。)