呢排熱焫焫，日日都超過30度，最佳消暑方法梗係食番個凍冰冰又多汁嘅水果啦！日本嘅水果又靚又甜，一向都係港人最愛，而夏天當造嘅水果有蜜瓜：代表有北海道夕張赤肉瓜、靜岡皇冠蜜瓜；桃，代表有山梨水蜜桃；同埋香港人最熟悉嘅提子，代表有巨峰及香印提子。可能大家食就食得多，但係唔係真係識得揀呢？等小編介紹一下啦。

每年6至10月係北海道蜜瓜當造日子，夕張、富良野、赤井川等都好出名，而夕張因為日夜溫差大，所以非常適合蜜瓜生長，糖度可高達20度或以上，而其他瓜嘅糖度一般在12-15度。夕張蜜瓜有青肉及赤肉之分，而受港人歡迎的是赤肉，因為佢每一啖都係嫩滑而多汁，要用匙羹「畢」嚟食，食落就感受到豐富既香味及有層次既甜味，入口即溶，而且佢嘅當造期只有最多2個月，因此更顯矜貴。夕張蜜瓜的糖度分為四級：最好的為「特秀」，跟著是「秀」、「優」及「良」。在香港通常吃到的是「秀」及「優」，而在日本可吃到「特秀」。

揀瓜貼士：北海道蜜瓜一般8kg一箱，大約有4-7個，數字愈少代表個瓜愈大個，小編建議大家揀每箱有5-6個，因為會比較鮮甜。另外可以睇網紋，愈細緻、愈密就愈甜，而且全個瓜嘅網紋都要平均，唔好一邊多一邊少。最後要睇T字椗，挺身係表示果肉未熟，反而果掟下垂好似枯萎咁，就代表果肉熟透，如果可以就撳埋個瓜底部，如果軟得嚟又有彈性都代表個瓜已經夠熟食得喇。

跟住介紹青肉蜜瓜，以靜岡縣出產嘅品牌—皇冠蜜瓜最出名，因為係皇室御用嘅溫室栽培蜜瓜！雖然種喺溫室，全年都有供應，但我地習慣咗夏天食西瓜食蜜瓜，所以小編都講吓點樣揀靜岡皇冠蜜瓜。佢最大特色係「一藤一瓜」，農夫每一棵樹藤只會保留一個瓜，令所有養分及水分集中喺一個蜜瓜，所以味道較一般嘅蜜瓜更香甜更多汁，甜度高達15度或以上。上文講到靜岡皇冠蜜瓜要喺玻璃溫室中種植，比一般嘅膠頂溫室透光度高，非常適合喜歡陽光嘅蜜瓜。更矜貴係每天用人手灌溉，倒水2至3次，並且喺隔離床栽培中提供必要的水和肥料（有機肥料），從播種到收穫大約需要100日咁耐。

揀瓜貼士：通過咗嚴格檢查嘅靜岡皇冠蜜瓜，先會有藍色貼紙，標明農夫編號，咁係農夫對佢產物有信心同埋負責任嘅表現。其次，呢張藍色貼級顯示呢個瓜係邊個級別：由高至低係皇冠標誌(山印)、皇冠標誌(白印)、皇冠標誌(A印)同埋雪山標誌，另外要睇表皮的網狀，越緊密、越細緻的網狀代表果肉越甜越多汁。而睇T字椗、撳瓜底部呢兩個方法，都適用喺靜岡皇冠蜜瓜。

下個月開始，大家又可以食到多汁到噴出嚟既日本水蜜桃！日本出產水蜜桃主要有四大產地—山梨縣、福島縣、和歌山縣及岡山縣，本來就係福島縣最靚，可惜311之後，該地嘅水蜜桃已絕跡果欄，由山梨縣取而代之，因為佢品質僅次於福島縣，加上佢嘅產量最高，所以香港生果舖都好鍾意引入。而日本挑三個最好品種依次為「曉」、「白鳳」、「川中島白桃」，前者以福島縣為根據地，山梨縣的主力品種是「白鳳」，果實重約250g至300g，果肉食入口感覺柔軟，以甜味為主、酸味較少，而且果汁含量多，入口有融化感，所以比較多人鍾意。至於「白桃」，香港多數引入岡山清水白桃，特色係白皮白肉，糖度以清甜見稱。

揀山梨水蜜桃貼士：由於香港嘅日本桃，多數都係嚟自山梨縣，所以小編就講吓點揀一個靚嘅山梨水蜜桃啦！大致分為四個步驟：睇，桃嘅外形要夠圓渾，椗位要冇爛、冇瘀以及冇蟲窿；然後要摸，個桃拎上手要有墜手感覺；跟住聞吓個桃，成個桃都會發出香味；最後就係切喇，果肉要多汁到噴出嚟。如果有時間仲可以望埋桃皮，要有細小絨毛，愈多代表愈甜。

至於山梨水蜜桃經常提到既大糖領、一宮（黑盒）、春日居，其實係山梨縣嘅品種，甜度、香味、嫩滑都覺有不同，鍾意食甜就買大糖領，鍾意嫩滑就食春日居，真正要分級別，就要睇特秀(或者大糖領)、青秀定係赤秀，排得愈前代表甜度愈高，特秀、大糖領嘅甜度要有13以上。

夏日去到最後，開始有少少秋意的8月尾、9月頭，就係食日本提子最佳時段！講起日本提子，大家一定即刻諗起巨峰同埋香印提子，小編都不用再多介紹吧！揀巨峰提子嘅貼士，首先要比較顏色，愈深色愈好，因為黑提喺陽光照射之下，會漸漸變得更深色，甜度亦隨之增加。較淺色（即係紅紅哋顏色)嘅巨峰，有可能係因為曬得唔夠，或者太早割落嚟，甜度就冇深黑色咁高，味道有可能較酸，有果皮的澀味。另外，果粒要大要圓，每粒緊密相連，唔可以脫落、軟化或凹陷，最後色澤要一致，外層帶俗稱「果粉」嘅白色粉末為佳。

至於香印提子，都係靠目測去分辨甜度，但就唔係愈深色愈好，反而要揀鮮亮嘅綠色，行內人稱為「飴色」。因為香印係白提子，如果陽光曬得夠，香印顏色會係鮮亮嘅綠色，代表佢甜度更高。另外可以睇樹枝，愈綠愈新鮮，如果提子唔夠新鮮，佢條樹枝都會黑黑地啡啡地，好似枯萎咁樣。最後睇埋所有提子係唔係飽滿，如呈現皺皮即已經收水。不過普通嘅青提子同香印提子好相似，又可以點分辨真貨定係冒牌貨呢？首先每束香印都包裝工整，大多以橙色紙包裹，並印上日文，如果用鐳射標籤就小心係假貨。其次，日本香印提子包裝紙上必定列明日本產地，例如長野縣產，以及JA認證 。除咗紙盒，每棵提子嘅果梗，都會有標明產地嘅標籤，你可以同紙盒對一對睇吓有冇唔同。咁當然，而家偽冒太先進，要做張假標籤有幾難，所以最好都係去番信譽良好嘅商舖買啦！