今年又冇得返「鄉下」—即係日本賞櫻啦！雖然自2022年4月8日起，佢已經解除對百多個國家或地區嘅入境限制，容許商務、學生或以就業為目嘅人申請簽證入境，但未包括觀光入境，就算遲嘅開放俾全部人，都應該過咗櫻期。好彩好多活動已經可以上網做，包括睇日本櫻花，小編介紹幾個Facebook專頁同埋Youtube頻道，帶大家眼晴去旅行啦。

經過今次疫情，好多嘢都可以坐喺屋企、用電腦上網就做到，包括去旅行。以前我哋覺得上網齋睇相好慘，但多得科技嘅進步，而家上網去旅行已經多咗玩法，例如拍到4K高清畫面、用航拍機喺高空俯瞰成個山頭或者公園櫻花、直播主一邊拍片一邊傾偈等等，加上環境聲音，其實同你親身睇櫻花差唔多㗎咋。小編精選咗6個Youtube頻道或者短片網站，帶你去日本不同地方花見。

NICONICO
唔止香港，日本疫情都好嚴重，上個月底地方政府更呼籲民眾唔好外出，而一啲公園仲關閉以免市民聚集睇櫻花。於是日本影片分享網站 NicoNico，通過部分關閉咗嘅上野Onshi公園攝影鏡頭，攪咗兩場網上直播，仲俾大家一路睇櫻一路留言，「場面」都好熱鬧。其中一場仲係雪見櫻，漫天粉紅色再配上點點雪花，好浪費呀。

網址：https://live.nicovideo.jp/watch/lv325004281

VIRTUAL JAPAN
呢度有好多4K高像素嘅賞櫻影片，仲嚟自不同嘅景點，例如京都御所、淺草隅田川、靜岡縣河津町、東京市中心等，長度由1個鐘至3個鐘都有，真係又要講多一次，好似你親身去咗現場睇櫻咁樣樣㗎。

網址：https://www.youtube.com/c/VIRTUALJAPAN/videos

吉田社長交朋友
同VIRTUAL JAPAN差唔多，都係拍片介紹唔同地方嘅櫻花，例如京都、上野、千島淵、六本木、中目黑等等，唔同嘅喺主持係由相信來自台灣嘅女仔，同埋佢哋嘅角度係更加遊客，例如中目黑睇櫻花，兩個女仔入咗去Starbucks，俾觀眾感受嘆住咖啡睇櫻花係咩感覺(雖然佢哋都係霸唔到露台位，只能企喺側邊拍片)。

網址：https://www.youtube.com/channel/UCzfNj5-UEvxOBErW2S3_bSg

Tokyo Explorer
如果你睇厭咗熱門嘅賞櫻景點，咁呢個Tokyo Explorer頻道帶你去睇一樣咁靚但冇乜人知嘅東京櫻花，例如有一段片係介紹多摩川嘅隱世靚景—多摩川已經夠冷門，仲要喺市內某一個公園，小編真係睇都未睇過。但由於旁述真係要去搵景點喺邊，所以都有幾多無聊位，大家可以飛住嚟睇。

網址：https://www.youtube.com/c/TokyoExplorer/videos

SAKURA DRONE PROJECT
除咗遊客角度，大家有冇試過由高空欣賞櫻花之美？舊年發起了「Sakura Drone Project」嘅一間日本無人機公司，今年繼續會於3月27進行「網上賞花日」，以無人機4K高清航拍，直播日本各地賞櫻勝地美景。如果錯過咗，可以去番佢地嘅Youtube頻道重溫，用全新飛鳥視角品味櫻花之美。

網址：https://www.youtube.com/watch?v=nZikR3JJDNs

日本菇菇菇
最近小編幾鍾意睇嘅Youtube頻道，因為主持嘅「菇菇」s都係香港人，聽番廣東話旁述特別有親切感。雖然櫻花片暫時得兩片，分別係中野同埋靜岡賞櫻，但有兩位菇菇聲意導航，感覺就好似同兩位可愛女仔一齊於櫻花漫步咁。加上佢地由香港人角度去拍，沿途又會介紹吓好味嘅日本小食、手信等，唔駛齋睇櫻花咁寡。
網址：https://www.youtube.com/c/JAPANGoGoGo3/videos

如果你剩係睇相已經滿足，咁仲簡單，問問Google大神，佢一定俾到好多櫻花相，但如果你想每日收到最新櫻花相、碌Facebook時順便睇埋唔駛自己搵，咁就要追踨一啲日本嘅組織Facebook專頁。小編又揀嚟6個比較多櫻花消息嘅日本組織Facebook專頁，大家有興趣都可以追踨。

一般社團法人千代田區觀光協會
千代田區係日本東京都的特別區之一，位於東京都區部嘅中心位置，如果你想睇東京市中心、東京站、秋葉原、靖國神社、神保町古書街等著名景點嘅櫻花，就要follow佢地嘅報道，同埋佢地都算更新得幾密，3月中開始開花，差唔多隔日就有更新，就算錯過咗都可以重溫番啊。

網址：https://www.facebook.com/ChiyodaCityPR/

大河原町觀光物產協會
目黒川可以話係東京都最最最熱門嘅賞櫻地點，相信唔駛小編多介紹，而呢個專頁就係專門影目黒川河沿途800棵櫻花，仲要每日更新。不過都4月中，所以睇相都睇到櫻花開始謝了，而3月尾係成條河都被櫻花「覆蓋」，所以想睇就要趁早啦。

網址：https://www.facebook.com/meguro.tourism/

仙台魅力再發現
而家已經係4月中，日本東北地區都開始有櫻花睇喇，仙台就係其中一個，4月8日正式開花。仙台魅力再發現專頁前幾日貼咗位於錦町公園嘅櫻花，而櫻花影片更會隨時喺限時動態發布，就算去唔到都可以跟專頁一起網上賞花吧。

網址：https://www.facebook.com/rediscoverSendai.Japan/

青森四季風情畫
青森最有代表性嘅賞花勝地，就係弘前公園，不過由開花到櫻花花瓣飄下形成花筏，最少都要一個星期。唔緊要，專頁將成個過程濃縮至一分鐘短片，由護城河到天守閣、由櫻滿開到櫻花筏，俾你一次過盡覽靚到爆嘅櫻美景色！除咗相，呢個專頁都會介紹櫻花膾祭活動，例如前幾日就舉行咗「櫻流鏑馬」神事儀式，選手都係女性，同其他地方只限男性參加係唔同㗎。

網址：https://www.facebook.com/aomori.seasons/

鳥取縣香港

小編介紹呢6個專頁，做得最有心機就係呢個「鳥取縣香港」，例如出帖詳細介紹鳥取市東南西北部，有乜賞櫻景點推介，仲有埋交通、地圖、一定要睇嘅風景活動等等，如果下年可以去日本，小編真係想跟住呢個專頁嘅介紹，去一趟鳥取縣花見呢。
網址：https://www.facebook.com/tottoriHK

五稜郭タワー / Goryokaku Tower
如果錯過咗三月嘅櫻花，唔緊要，最北嘅北海道仲未開花，快嘅跟蹤呢個專頁，佢會俾你睇當地最出名嘅賞櫻勝地—
五稜郭公園千幾棵櫻花。正如專頁所言：每當櫻花綻開的季節，從高空往下看，彷如一粒粉紅巨星，璀璨奪目，視覺都好震撼。
網址：https://www.facebook.com/goryokaku.tower