呢排日日好似火爐咁熱，應該好多人都會長開冷氣，但坊間有人話定頻冷氣長開就好嘥電，亦有指變頻冷氣長開係好易壞，雖然慳咗電費但貴咗維修費，到底真唔真呢？其實所有機器，如果你唔適當咁用，自然有反效果，所以想冷氣機慳電又環保，最緊要係正確嘅使用方法！

變頻冷氣或定頻冷氣，最大分別係有無變頻器去控制供電頻率俾壓縮機，從而調節佢嘅運轉速度：當供電頻率高，壓縮機轉速快，冷氣機製冷量就大，反之供電頻率低，冷氣機製冷量亦會減少。定頻冷氣嘅壓縮機轉速唔會有快慢，只有轉或者唔轉。

當你開著變頻冷氣機，變頻器以超額120%-130%的電力頻率，令壓縮機短時間內將轉速提升至最高，將室內溫度迅速降低，直至室溫達到你指定嘅溫度，呢個時候壓縮機自動調低轉速，僅以所需嘅功率維持你預設定嘅溫度。簡單啲講，變頻機就係因應室內溫度變化，而改變供電頻率，咁就唔會浪費咗多餘嘅電力去驅動壓縮機了。

至於定頻冷氣，你開著佢，壓縮機係100%運作，直至室溫跌到預定溫度就唔轉，咁冇冷氣出，室溫自然又升番，為要降回預設溫度，壓縮機又全力運作，不斷循環，所以定頻冷氣機就等如你不停地撳開關掣，而且次次都係全力運作，可以想象係比較嘥電。咁又開又關，室溫又會唔會忽冷忽熱？定頻係咪一定嘥電過變頻，控制室溫又有咁差咩？睇埋落去就有更多答案。

雖然定頻與變頻冷氣，分別在於佢地有冇變頻器去調節壓縮機轉速，但係唔係因為咁樣，就令兩者喺售價、慳電、壽命、舒適度有差別？小編而家逐一分析！

定頻冷氣平過變頻？

定頻冷氣嘅售價平過變頻冷氣，因為前者已經發展咗好耐，而且運作好簡單，但後者仲算係新科技，加上零件較多、需要更高技術。小編於網上電器店友和，比較定頻與變頻冷氣機價錢，發覺相差好遠，例如同樣係惠而浦一匹窗口式冷氣機，定頻售價2,759元，變頻就要3,549元，相差790元；美的兩匹窗口式冷氣機，定頻售價4,509元，變頻就要6,380元，相差1,871元。至於掛牆式，三菱定頻淨冷掛牆式分體式冷氣機 1匹售價3,439，而三菱變頻淨冷分體式冷氣機 1匹則要4,759，相差更達1,320元。

變頻冷氣更慳電？

如果我哋計埋電費，根據消委會於2016年測試發現，變頻式樣本比起定頻式，全年慳電4成，消委會假設每年開機180天，每天12小時，以每度電$1.2推算，變頻式樣本每年所需的電費由$469至$567，定頻式則需要$839至$908。如果將電費加埋機價考慮，起碼要用多過一年半甚至再多一些才打個和。難怪有唔少租屋住嘅朋友，都唔想嘥多啲錢換部變頻機了。

但有資深冷氣機專家就話，變頻機唔一定慳電，都要睇你嘅使用習慣、房間的實際製冷需求及開機時間等各種因素。

第一，如果習慣開冷氣的時間短，變頻機先要超頻驅壓縮機運作，係比定頻機更耗電，當到達預設溫度變頻機維時低頻供電，咁就係佢最慳電嘅時候，所以，這段慳電時間愈長，便愈能顯現慳電嘅優勢，據專家意見，如果屋企平均每日都連續開四個小時嘅冷氣，咁就適合用變頻冷氣機。

第二，如上所講，大多數屋企用冷氣最長嘅時間係睡房，晚晚吹住嚟瞓覺的話，用變頻機絕對慳電。但如果個廳只係食飯時或睇電視時開一陣，未必日日開到四個鐘，咁用番定頻所花嘅電費可能差唔多。

第三，要配到啱匹數嘅變頻冷氣機，如果買細咗匹數，冷氣機為維持預定溫度，唔夠力之下，不斷開盡壓縮機去降溫，變頻都變超頻，不但慳唔到電，仲會好嘥電，有專家便建議，如果地方需要1匹的定頻冷氣機，買一部大1.5匹的變頻機便更理想，因為，咁可以在更短時間將室溫調到預設溫度，再用低頻維持，便進入最慳電的情況了。當然，如果你選擇定頻機，便要買剛好夠力推嘅匹數，買大咗就會好嘥電。

定頻冷氣長命過變頻？

好多人話，變頻冷氣一般比定頻易壞，係因為佢嘅電路板、內部結構要比定頻冷氣複雜好多，對零件嘅要求都高好多，所以容易出現故障，但科技係會進步嘅，變頻機發展咗好幾年，好多技術都更加先進成熟，一啲有信譽嘅大牌子，質素比初代進步唔少，所以壞電路板嘅機會亦大大減低，唔少用緊變頻嘅朋友都話用咗幾年都未壞。據維修師傅講，變頻機壞嘅最大原因係操作不良同安裝不善，仲有就係喺海邊潮濕嘅環境，乜嘢冷氣機都易壞。

另外，又有人講定頻冷氣，佢嘅運作原理好簡單：俾電去壓縮機就轉，停電就唔會轉，講落好似好有道理，其實，佢哋只係講舊時代嘅定頻機，新時代嘅定頻機一樣有好智能同複雜嘅功能，一樣需要電路板，同變頻機一樣有壞嘅機會。當然，維修變頻機嘅成本確係較高，但要講到易壞，反而係定頻機嘅壓縮機長期100%運行，而且時開時停，比起變頻機多數時間都喺低頻運行，其壓縮機嘅壽命比較短。無論係變頻、定頻，用得好隨時都可以用超過10年。

變頻冷氣舒服過定頻？

在維持預設溫度上，變頻確係比定頻優勝，因為佢可以用壓縮機唔同嘅轉數穩定咁維持室溫。而定頻嘅壓縮機只能喺溫度變化嗰陣選擇開盡轉數或停止運作，室溫係會有波動嘅，但據專家解釋，控制壓縮機開關嘅係溫度感應裝置，如果設計同調校得好，定頻機喺預設溫度嘅控制上，大概喺2-3℃之間，人體對於呢個氣溫變化無乜太大感覺，所以，好少人會投訴用定頻機會覺得忽冷忽熱，搞到瞓唔好覺，如果係咁，應該係冷氣機壞咗，而唔關定頻嘅事。

變頻除咗控制預設溫度更精準，就係低頻運轉嗰陣噪音少好多，但呢啲噪音只限喺窗口式冷氣機，而分體式冷氣機嘅室內噪音主要來自風扇運作，而非壓縮機。

正如上文所講，變頻冷氣壞咗要好貴嘅維修費，想用好啲就記住以下幾點：

– 變頻冷氣唔好頻密咁又開又關，咁樣唔單止嘥電，仲會導致變頻功能無法發揮，縮短變頻冷氣機壽命，所以著咗冷氣後，就由得佢開一段時間。

– 而家多數變頻冷氣都有防潮設計，長著反而有好處，因為通電會啟動防潮功能，無咁易因為潮濕而整壞電路板。

– 唔好直接關電源，咁好大機會整壞電路板，最好就係用遙控熄機，等變頻冷氣機內嘅電壓慢慢平伏，大約需時15至30分鐘。

– 熄冷氣之前，將佢由冷氣模式轉做風扇模式，吹10至15分鐘，有助降低溫差減少積水，又可以吹乾冷氣機盤下嘅積水。不過咁樣做其實好煩，不如買機嗰陣，㨂一款有防霉功能嘅機，佢就會喺熄機後，自動運行風扇10至15分鐘，吹乾機身內部，防止發霉。

– 隔塵網最好每個月清洗一次，另外打開冷氣機面蓋，裡面嘅蒸發器機組都要經常清潔，但唔好用腐蝕強嘅清潔劑噴，再用牙擦擦走污垢就可以。

– 無論變頻又好定頻又好，冷氣機唔可以長時間唔開，如果過咗夏季，都建議每個月開半個鐘，等零件冇咁易老化。

– 唔好喺大房、大廳用小功率嘅冷氣，咁會導致高負荷運轉，好容易chur死部冷氣。