踏入七月，北半球突變成大火爐，無論是日本、中國、香港甚至歐洲，都日日起碼三十幾度，部份地方更超過40度！如何降溫，大家各師各法，例如香港就鍾意用風扇、掛頸式冷氣機，日本就仲多降暑神器，平得嚟又實用，等小編介紹其中四款，如果你都想試，仲可以透過網購，將神器買番香港使用㗎。
1. Thanko噴霧縮骨遮
有留意掛頸冷氣機嘅朋友，都應該聽過Thanko呢個名，原來佢仲有好多消暑神器，例如呢款可以放入袋嘅噴霧縮骨遮。佢除咗可以擋陽光、擋UV等你冇咁熱，遮柄頂部仲有四個「噴霧位」，你抬起頭就會感受到灼熱嘅皮膚上面有涼爽霧氣。遮柄有個LED顯示位，長按3秒就會噴霧10秒，然後停5秒，跟住又噴10秒，如此循環5分鐘。遮柄底部有個位俾你入水，最多儲存45ml，廠商話水量足夠你重復3次噴霧，即係噴到15分鐘，冇晒水可以再入過。續航方面，你可以用USB替縮骨遮叉電，叉爆後就用到2.5個鐘，如果電量不足25%，遮柄LED會變成紅色。不過用到2.5個鐘，相信都夠你行街或者等車果時用嚟降吓溫。
售價: 5980日元
網店: 樂天市場
2. Thanko風扇太陽帽
上面講果把遮其實都幾貴，同廠呢頂內置小風扇嘅太陽帽就平啲，大約港紙220蚊（未計運費）。呢頂帽遮光嘅地方，藏咗兩把細風扇，做到既幫你擋陽光又送到涼風俾你。放喺頭可以吹到條頸甚至背脊，亦可以掛頸咁風扇就向上吹，咁就可以消除面罩悶熱，或者眼鏡朦咗變番清。兩邊柄可以調整角度，而風力分為三級，小編冇親身試過，所以唔知弱、中、強有幾大分別，不過續航就有明顯分別，由5個鐘、3.5小時至2.5小時，叉爆電就要3小時，支援USB type C。風扇太陽帽係幫唔到你頭頂擋太陽，所以廠身都建議你先帶一頂正常嘅帽，然後再將風扇太陽帽放下邊，咁就會涼好多。
售價: 3980日元
網店: 樂天市場
3. Doshisha Otona便攜式刨冰機
下雨天總掛念從前，而大熱天就令小編諗起以前大大杯任斟嘅思樂冰！雖然都係雪涼咗嘅汽水，但咬落有冰嘅感覺又真係令人又涼爽啲，而家你有呢個Otona便攜式刨冰機，就隨時都歎到思樂冰啦！佢係用電芯操作，所以唔駛插住電線，方便你喺任何地方製作刨冰，例如你去海灘曬緊太陽、喺船P玩完水上活動，馬上飲到杯雞尾酒降一降溫。刨冰機底部有一粒花型掣，俾你一路刨一路左擰右擰調校冰絲嘅粗幼，唔駛刨之前斷估。刨冰機入口都幾大，大約放到6-7粒冰格製成嘅冰塊，每次刨一分鐘，不過廠方就冇講4粒AA電可以刨幾耐。隨機仲附送食譜，不妨參考吓點樣整到更多適合夏天食嘢餸啦。
售價: 3828日元
網店: 樂天市場
3. Bruno迷你流水麵機
最後要介紹出咗無幾耐嘅Bruno流水麵機。呢間廠商之前都出過流水麵機，不過大部好多，今次你可當係迷你版，適合兩個人用，如果你同另一半咁熱冇胃口，咪試吓食日本冷麵囉。佢都係用電芯操作，今次兩粒AA電就夠，不過都係冇講可以用幾耐，但小編估計，部機係設計嚟俾你地食住飯用，都應該唔會得一兩個鐘就要換電卦。麵嘅配料可以放喺機頂凹位，隔離係開關掣，減少被沾濕機會。睇住冷麵喺部機入邊轉嚟轉去，感覺都幾得意，小朋友仲可以玩住嚟食，相信胃口都會大增啦！
售價: 268港元
網店: 友和
金巴利臣
一得閒就會四圍八，搵平嘢、搵好嘢，就算花時間都係值得。
