第五波疫情開始緩和，政府有望喺4月21號放寬部份限制社交距離措施，例如晚市有得堂食、每張枱由兩個人加到四個人等，即係我哋可以約埋幾個朋友、或者一家人分兩枱出街食飯喇。再加上有消費券，應該好多人會「報復式出街食」，小編搵嚟呢五家超人氣餐廳，你想食就真係好即刻訂位喇。
1. 全港最難訂位嘅下午茶—The Butterfly Room
香港瑰麗酒店嘅The Butterfly Room下午茶，被稱為全港最難book位嘅High Tea，沒有之一，小編4月1號下午去佢嘅網上訂位系統睇一睇，原來下午茶最早都要6月9號嘅下午1點鐘了，即係要預早兩個月去訂位！不過又唔駛絕望嘅，因為不時都會有「黃牛」放棄訂咗嘅枱，或者你每日都去個網上訂位系統望吓有冇「吉」枱。
而今期較多人推介嘅，係有果香容易入口嘅The Butterfly Room Blend、 麵包鬆軟兼內餡配搭出色嘅Caviar & Smoked Salmon、撻皮鬆脆牛油夠香但稍嫌較甜嘅Yuzu Tart、Original Scones同Raisin Scones細細粒外皮香脆質感唔粉，柑桔味醬甜度適中又開胃，不過Confectionery Trolley全部都係士多啤梨同紅桑子，如果唔係太鍾意嘅可能會覺得厭，最後當然唔少得Mille Feuille，今次係玫瑰味，餅皮依然咁酥脆。
地址：香港九龍尖沙咀梳士巴利道 18 號 Victoria Dockside 香港瑰麗酒店
電話：3891 8732
訂座網址：https://www.sevenrooms.com/reservations/butterflyroomhk
2. 超級隱世但又好出名嘅Omakase— Omakase Iki 粋
可能兩個人食飯係最唔受限制，所以近呢一年多咗人去食Omakase，條街都開多咗呢類食店，但位於尖沙咀漆咸圍嘅Omakase Iki 粋都係咁難訂位，因為佢真係太少位了，你又係要預等兩個月吧！由於係廚師發辦，所以去到先知有咩食，又或者你訂房，咁可以同師傅講低想食乜等佢地準備。
如果係坐bar枱，廚師會同你傾計，了解你嘅口味，再決定落幾多醬油同整咩俾你食，而侍應亦會講解食物種類來源特色同埋建議食法，專業又細心。另外佢價錢唔算貴，壽司十五貫都係$520，Omakase貴少少要$880但有炸物、湯同甜品，而三款套餐大約$1300至$1800，亦有刺身、壽身、料理、甜品等，小編就未食過但應該都會幾飽囉。
地址：尖沙咀漆咸圍10-12號4樓
電話：9215 8511
訂座網址：https://www.urbanhousehk.com/tc/eat_drink
3. 親民價錢食法國菜—Jean May
法國菜總係俾人貴價嘅感覺，所以一間價錢親民仲要好味既法國餐廳，一枱難求都好易理解！連大名鼎鼎嘅飲食專欄作家葉澍堃，都要等兩個月先有位，證明Jean May對每個人都係平等，抵讚。話佢親民價錢，例如小食$68至$110、前菜$170至$220、主菜$300左右，再加個甜品，如果唔飲酒咁每人都唔駛$1000，你去比較出名嘅酒店或者半山蘇豪食法國菜，一定唔止呢個價錢。
講番出名嘴尖嘅葉澍堃，佢去到Jean May食咗咩呢？都係Jean May招牌菜：炸薯條同埋牛肉他他，「手切薯條大大條，炸得香口鬆脆．．．一家人速食兩碟，心滿意足」，而牛肉他他「做得很好，澳洲牛肉有點咬口，最精彩是用茄汁、芥末、喼汁、酸豆、Tabasco 辣汁、番茜和大葱做的醬汁，加隻生雞蛋，跟牛肉撈勻來食，美味得難以形容。」剩係睇文字都叫人食指大動。另外，最近毛舜筠都有幫襯Jean May，仲拍埋片放上Youtube，大家又可以睇吓有幾好味。
地址：灣仔機利臣街14號地下A號舖
電話：3590 6033
訂座網址：https://www.sevenrooms.com/reservations/jeanmayhk
4. 好似去咗郊外Hea吓打吓卡—Muse Furniture Lab
小編都知大家有抗疫疲勞，好似離開屋企到出面走一走、抖一抖，所以介紹呢一間位於元朗錦上路嘅餐廳，俾到你「帶住個廚房去野餐」嘅感覺。餐廳周圍就好似一個小型嘅私家花園，鋪咗人造草地、種咗唔同顏色嘅植物，你可以選擇坐喺「花園」食嘢傾偈，就當同朋友去一次野餐。但餐廳入邊就另一個風格，係玩超型嘅歐陸暗黑風格，鍾意打卡嘅人肯定影不釋手。
餐廳另一邊係懷舊復古的傢俬陳列室，裡面擺放咗多件充滿英式古董味嘅梳化、水晶吊燈、風壁爐等，但又有現代嘅Ironman盔甲和Marvel無限手套，好大對比啊。不過餐廳位置係偏遠嘅，小編建議搭港鐵去到荃灣站或荃灣西站，然後轉乘巴士 251M或51，喺上村總站下車再行3分鐘就到。但要留意，你必須預約，同埋有人均最低消費$150至$200，用餐時間係85至110分鐘，交枱後你隨時喺傢俬店或者花園點影都冇限制。
地址：元朗錦上路26C號地鋪
電話：9332 6168
訂座網址：https://inline.app/booking/muse/furniturelab?language=zh-hk
5. 連續14年拎米芝蓮三星—龍景軒
打咗針、又放寬堂食，梗係要去飲茶、見到soon仔，哈哈！今次仲有5000蚊消費券，一於食、盡、佢！如果你本住人一世物一世，咁四季酒店入面果間中菜館—龍景軒，真係要去見識吓。佢係連續十四年榮獲米芝蓮三星評級嘅中菜食府，全港最威係佢，又係沒有之一。雖然名氣大、地點高尚，但如果你真係去飲茶、食吓點心，又唔駛5000蚊嘅，除非你食到鮑蔘翅肚、再嚟多碗清燉官燕伴杏汁做甜品，咁就差唔多要咁貴。小編當你叫咗龍景軒四款招牌菜：松仁叉燒菠蘿包、龍帶玉梨香、鮑汁一品魚肚煲同埋原隻鮑魚雞粒酥，兩個人都係$1500，連茶錢加一貼士，$2000落得樓了。而米芝蓮就推介羊肚菌爆澳洲特級和牛柳粒、上湯焗龍蝦球同埋北京片皮烤鴨，大家「筆直」鬆動啲嘅可以試吓。
地址：中環金融街8號香港四季酒店4樓
電話：3196-8882
訂座網址：http://www.eat2eat.com/FourSeasons/Pages/Reservation.aspx?relId=MwA0ADQANQA%3d&lang=0&pro=0&br=0&ho=0&res=0&ci=0&ms=1030
金巴利臣
一得閒就會四圍八，搵平嘢、搵好嘢，就算花時間都係值得。
