蘋果話iOS 16係「史上最大型鎖定畫面更新」，果迷就搶住下載去試新功能，如果你仲未決定好唔好跟，小編勸你不妨等多等！因為好多外國或者大陸果粉測試過iOS 16，搵到大量嘅bug，輕則令你使用唔順暢、嚴重者更會令原有app無法運作、耗電勁快、甚至對粒電都有壞影響。所以你想升級iOS 16，不妨睇埋小編呢篇介紹再算。

Apple 喺今年6月6日舉行嘅「WWDC 2022」全球軟件開發者大會上宣布，推出一系列新iOS、晶片等，最多人關注就梗係iphone嘅新OS—iOS 16有beta版啦！為咗易睇，下文將iOS 16 beta 1版本簡稱為iOS 16，佢主要有8項新功能，例如更個人化以及俾用戶自訂功能嘅鎖定畫面、語音及文字輸入即時轉換、整合「鎖定畫面」嘅專注模式、長撳相片嘅人像就可以褪掉背景、「原況文字」喺影片都用到、毋需Apple Watch都可用到Apple嘅健身App等等。

不過呢個新iOS，只係支援iphone 8之後嘅iphone，包括：iPhone 8、X、11、12、13任何型號同埋SE第二、三代，合共約20個型號。換言之，iPhone 8以下嘅型號，包括仲算多人用緊嘅iPhone 7、iPhone 7 Plus，同埋iPhone 6s、iPhone 6s Plus及第一代SE，對不起喇，你地最多只可以更新到iOS 15.5。雖然外界都估到iOS 16會放棄對iPhone 6S、iPhone 6S Plus同埋已經停產嘅iPod touch支援，但連比較新嘅iPhone 7和iPhone 7 Plus都唔包括，就令好多人感到意外，包括一眾仲用緊呢兩款手機嘅用戶，因為iPhone 7只係推出咗5年咋。

就算裝到iOS 16，你都唔好咁開心住，因為唔係所有型號都用到佢所有功能，「災情」最嚴重係iPhone 8，好多iOS 16功能都用唔到，外界估計係因為佢仲用緊A11嘅晶片，但iOS 16好多功能要A12等級以上嘅晶片才支援。根據網站9to5mac報道，iPhone 8用唔到iOS 16嘅功能包括：語音及觸控輸入嘅即時切換聽寫功能、原況文字、一鍵去背的圖像查詢、利用Siri功能發現特定應用程序、利用鏡頭添加藥物訊息等。

另外iOS 16有部份功能，亦只適用於某些型號，包括：英文實時字幕顯示，就要iPhone 11以上型號先用到；拍攝人像前令前景模糊、電影模式錄製時提高質量等功能，就只限iPhone 13先用到。其實有果粉仲搵到一個隱藏功能：隨顯模式，讓用戶嘅手機係冇掂芒情況，都顯示到時鐘、電量等訊息，外界推測呢個係iPhone 14嘅獨有功能。

小編夠膽講，iOS 16最大中伏位，一定係佢超級食電。好多twitter博主、關注iPhone嘅網站、手機youtubers都不約而同指出，裝咗iOS 16後手機電量跌得好快，正常使用一粒鐘，耗電量比更新前增加咗大約50%！另一位youtuber「阿康嚼舌根GOODSKANG」就話，佢著芒嘅時間只有8分鐘，但各種嘅App就不停咁食電，最神奇係佢瞓覺嘅時候，手機明明擺好咗唔會四圍郁，「暴露通知」竟然不斷咁食佢嘅電，佢講笑話「唔通防疫中心秒秒鐘都拎緊佢資料」？

另外，根據 OFweek電子工程網，有博主為iOS 16有幾食電做咗跑分測試，發覺無論係待機定係續航，iOS 16都比起其他版本更食電。該博主用電池健康係92%嘅iPhone 12 mini做跑分測試，待機7小時，iOS 16就用咗21%，而iOS 15.5、iOS 15.4.1及iOS 15.0.2只係15%、16%及12%；之後佢做埋續航測試，用iPhone 13 Pro跑分，iOS 16嘅3小時消枆電量係67%，而iOS 15.5、iOS 15.4.1及iOS 15.0.2只係48%、48%及49%。

外國果粉都喺twitter報告了iOS 16嘅食電情況，例如Jon Prosser就話佢手機更新後，喺屏幕亮度低嘅情況用20分鐘，手機就明顯發熱，用一個鐘頭電量由100%跌到78%。Ben Geskin就話，佢部手機嘅電池健康本來係100%，但一升級上iOS 16就即刻得番97%，咁令到續航問題雪上加霜。

如果你平時需要用網上銀行，咁小編真係建議你唔好升級去iOS 16。Twitter用戶wongmjane就話，佢裝咗iOS 16再測試香港人常用嘅app，其中匯豐、中銀香港、恒生銀行、渣打、八通達及MTR Apps係用唔到，但Citibank用到，Mox、ZA等虛擬銀行都得，電子支付嘅PayMe、 Alipay HK同Tap&Go都冇問題，仲有安心出行都用到。

另外有大陸網民話，裝咗iOS 16後令微信好多問題，包括微信聊天、發圖片、小程序、刷朋友圈、看視頻號、切換賬號時，均存在閃退可能；天貓商城、唯品會等 App，就存在圖片無法正常加載的情況；甚至用鏡頭掃二維碼，都試過出黑屏！最後係B站、優酷等短片App，喺睇片嘅時候，篤橫向全屏顯示會冇反應，但youtube橫向顯示就變咗逆時針，即係瀏海去咗右邊而喇叭位在左邊。

而台灣網站瘋先生，就收集咗台灣用戶喺用iOS 16，手機app曾經出現過咩問題，包括：Line文字語音輸入會彈app，其他地方語音輸入都唔得；FaceBook夜間模式會跳番去日間，同埋語音用唔到；Speedtest測速軟體無法正常運作；Safari第一次開啟時網址列有顯示問題；天氣APP無法顯示天氣資料等。

iOS 16新加入「充電過熱保護機制」：當手機叉電時，若果系統偵測到內部溫度過高，就會暫停叉電，原意係保護粒電池。不過有打機嘅網民就話，打一陣機部iPhone已經好熱，咁食電又食得快，真係有需要叉住電嚟打機喎，用咗iOS 16就做唔到，打機唔可以打到幾耐，喺佢地眼中呢個保護電池功能變咗伏位！

講開打機令到手機好熱，上文提及的OFweek電子工程網嘅博主，都有為iOS 16做咗溫度測試，佢用iPhone mini 12玩和平精英20分鐘，然後量度機身最熱溫度，iOS 16高達44.2度，而iOS 15.5、iOS 15.4.1及iOS 15.0.2只係39.8度、39同埋39.2度。其實除咗打機，就算手機只係正常使用，有用戶都覺得用咗iOS 16後iPhone都會比之前熱呢。

另外，裝咗iOS 16後，玩手機game會有「掉幀」問題：由於硬體不足以負荷顯示器畫面動態顯示刷新的頻率，從而幀率過低所造成的畫面出現停滯，即係會窒吓窒吓，或者畫面起格等，以「王者榮耀」問題最嚴重。又叉唔到電、又過熱仲要窒吓窒吓，小編建議就算日後iOS 16正式推出，喜歡打機嘅朋友都要等其他人試過冇問題，先好更新呢。

總結：當然beta嘅目的，就係俾開發人員去試吓程式有咩問題，結果如蘋果所願，短短一個星期，熱心嘅用戶已經搵到唔少問題，希望蘋果盡快解決啦。另外，如果你得一部手機，就唔好貪新鮮去試玩iOS 16，雖然可以降級，但都要花你一段時間，小編覺得唔值得囉。