獸醫收費爭議不斷！消委會近期接獲市民投訴，指有動物診所用唔同理由去拖延退款，亦有診所收費唔清晰，令寵物主人俾錢大失預算，甚至有被人呃嘅感覺。想知具體經過係點？立即睇文！

獸醫收費爭議1：難退款

A先生愛犬因抽搐睇獸醫，診所建議幫狗狗做磁力共振，搵出病因，需費3萬，而A先生亦同意用12個月分期方式俾錢。

可惜，狗狗病情惡化，未做磁力共振，已需進行安樂死。之後，A先生希望診所退還未用嘅狗狗診金，合共萬1蚊。診所就反建議A先生將診金留俾將來嘅寵物用，但A先生拒絕。於是，診所就指A先生係用分期方式俾錢，所以退款要等12個月後（即A先生向銀行清繳所有款項）先拎得番，A先生於是向消委會投訴。

消委會介入後，診所解釋係因為A先生用咗分期付款，佢要先向銀行還晒所有錢，並向診所出示相關月結單，診所先可安排退錢，否則就收6%行政費。A先生最後都係先向銀行還清所有款項，等診所安排退款。

獸醫收費爭議2：價錢不清晰

C先生帶狗狗去睇獸醫，獲告知愛犬需進行膽囊切除手術及治療，費用6.5萬。C先生同意診所建議，但完成手術後，診所竟然收佢12萬6，而唔係先前講好嘅6.5萬！雖然診所收據上面，已列明每項治療及醫療物資嘅細節，但C先生話診所從未就任何額外收費通知佢，所以佢向消委會投訴。

經消委會介入，診所堅持C先生為犬隻辦理入院手續時，已獲告知一切及簽署同意書，知道所有可能需要嘅治療同收費，動物診所不會作出通知。但C先生仍堅持最終收費同報價差太遠。最終，消委會建議C先生向香港獸醫管理局投訴。

獸醫收費爭議3：最低消費

D小姐帶愛貓睇完獸醫，事後佢睇張單，發現抗敏感藥每粒2蚊，醫生處方5粒，收70蚊，而杜蟲藥劑每毫升$2.06，醫生處方8毫升，收$61蚊，D小姐覺得唔合理，於是返診所理論。

獸醫診所就解釋，每項藥物係有最低收費（即係$70蚊）。換言之，杜蟲藥其實係D小姐俾少咗9蚊。之後D小姐再睇收據內容，發現並無任何關於「最低收費」條款，佢認為診所有隱瞞收費之嫌，於是向消委會投訴。

消委會調查後，診所承認未列出有關最低收費嘅安排，因此，同意退回差價。

如果你想知道最新的健康資訊，可點擊以下連結。