等多兩日，萬眾期待嘅第二期消費券就到手啦！一如上期，好多商場都攪優惠＋抽獎去吸客，但今次小編覺得今期抽獎嘅禮物豐富咗、優惠都多咗，例如有商場送價值42萬嘅寶馬128tiA、高達二萬幾蚊嘅回贈、或者兩折買潮流用品，都咪話唔筍！

恒基地產旗下7間商場：MCP CENTRAL & MCP DISCOVERY（即新都城中心2期及3期）、MOSTown新港城中心、荃灣千色匯、元朗千色匯、沙田中心＋沙田廣場、屯門時代廣場及利奧坊，喺8月12日開始推出「夏日購物3倍Fun」，為H.COINS會員帶嚟3重獎賞。H.COINS會員用任何支付方式，喺呢七間商戶買嘢或者食嘢，再用app成功登記商戶機印發票及電子交易存根，就即刻有著數。首先喺會員每次累積消費滿$1000蚊，即可獲得戲院禮券一張，每位會員於推廣期內最多可以換取戲院禮券2次；其次係合資格會員可以額外獲得2000個COINS，每位會員於推廣期內最多可獲額外2000 COINS獎賞2次；最後係每駛一蚊就得一個COIN，例如會員消費1000蚊就得到3000COINS，可以用嚟換番商場電子禮券、獎賞或者精選禮品。

新地旗下的12大商場，包括東港城、北角匯、上水廣場、將軍澳中心、Mikiki、PopWalk天晉滙、life@KCC、卓爾廣場、錦薈坊、荃錦中心、荃灣新領域廣場及屯門寶怡商場，由即日至9月30日推出「夏日旋風大抽獎」，送出超過40萬份「Chill」級獎賞，總值超過400萬蚊！大獎係價值27萬3千蚊嘅比亞迪ATTO 3電動車、仲有價值1萬4800蚊嘅OGAWA Mysofa按摩椅、價值9299蚊嘅iPhone 13 Pro 256GB、價值約6000蚊嘅粉紫色iPad Air 256GB Wi-Fi版及500萬The Point積分等。

參加方法好簡單：The Point會員單一消費每滿$200，就可以參加「旋風終極大抽獎」及「夏日Chill住獎」各一次；消費滿$400就有兩次抽獎機會，如此類推，每張消費單據最多有25次機會，消費愈多，中獎機會愈大。

新地商場仲送電子贈券同埋免費泊車券，由8月7日至8月31日，於指定商場消費滿$500，即送$50電子贈券及1小時免費泊車券、消費滿$2500就有$500電子贈券及2小時免費泊車券、消費滿$5500送$1500電子贈券及3小時免費泊車券。推廣期內更有The Point會員優惠，佢哋喺指定商場嘅Point Dollar參與商戶即日消費滿$200，並於該交易內使用最少$20 Point Dollar，即額外送$10電子贈券。

另外，新地仲聯同5間發放消費券嘅儲值支付工具，喺旗下25個商場推出連串專屬優惠，送出總值近2000萬元獎賞。例如市民喺8月5日至10月30日期間嘅周五、六及日，用八達通卡消費滿$200兼成功登記The Point積分，可獲一個電子印花，集齊三個印花即可換領$20 Point Dollar，喺商場買嘢食嘢當現金咁用。

抽獎就視乎個人運氣，所以好多人覺得回贈更實際！APM由8月5日起，The Point會員用200分換領預留證，憑證喺周六、周日同埋公眾假期，用6個電子支付豪駛消費券，就拎到高達$800優惠券兼同時賺取積分。至於消費滿300蚊，就有一個抽獎機會，獎品包括4K電視、iPhone 13Pro Max、按摩椅、五星級酒店Staycation同賺到Point Dollar，仲有機會獨贏價值超過20萬嘅時尚房車。而拎到消費券果日即係8月7日，APM舉行「開心消費JETSO DAY」，勁多著數驚喜禮遇等住你，消費滿$100就有消暑清涼福袋或者松本清美顏福袋，又可以低至一蚊買到各款月餅、蛋糕同埋朱古力。

至於荃灣廣場就喺8月1日至31日推出「SUMMER FUN即抽即中賞」，市民消費滿$500，即有機會即場抽到iPhone 13 Pro Max、Dyson V15 Detect Absolute Extra吸塵機、任天堂Switch Lite、Apple Watch Series 7、名牌家電、床品及珠寶產品等超過3萬份獎品，每人每月有3次機會。另外消費滿3000蚊就送100蚊商場電子贈券、消費滿7000蚊有$250一田及商場電子贈券。

嫌送車、送手機太普通，送價值10萬蚊嘅匯控股票又點睇先？由8月1日至28日，The ONE Club同WINDSOR CLUB嘅會員，分別喺The ONE或皇室堡任何商戶以電子貨幣：信用卡、易辦事、八達通、手機支付等方式消費，憑最少3間唔同商戶嘅即日機印單據，而每張金額必須滿$100蚊，之後將所有電子貨幣付款存根，喺The ONE或皇室堡app或顧客服務中心登記積分，累積消費金額最高就得到5手滙豐控股，目前市值超過10萬蚊呢！

呢兩間商場仲有其他優惠，包括顧客即日起至 8月28日，透過電子支付喺場內消費滿$1000，即可獲得$100購物現金券，而消費$3000就有200蚊購物現金券＋300蚊美食現金券。另外，去佢哋嘅eSHOP購買6大商場現金券，每滿$500即可額外獲贈購物現金券$100，每次最高可享$500回贈！

「圓方之友」由即日起至8月31日，憑零售消費滿$5000、$10000及$60000，即享總值$2000、$5000及$28000嘅ELEMENTS圓方電子禮券及商戶電子禮券。另外，憑合資格嘅銀聯支付方式（只適用於卡號以62開頭的合資格銀聯卡、銀聯手機閃付或銀聯二維碼），於ELEMENTS圓方消費滿指定金額，可額外得$100至$1200 ELEMENTS圓方電子禮券。即係話，如果你用銀聯俾錢，買嘢超過6萬蚊，總共拎到$29200禮券。商場亦推出「周末時尚服飾獎賞」，顧客於指定日子、憑指定時尚服飾消費單據換領消費獎賞時，更可額外獲得總值$1000獎賞。另外兩間新店：健康西餐廳Alimente及英國女裝運動品牌Sweaty Betty，分別帶來限時開幕優惠，於Alimente惠顧任何套餐外賣自取可享85折優惠；而由即日至8月31日，憑PREMIERE CINEMAS即日電影戲票於Sweaty Betty購買正價運動緊身褲可享85折優惠。

為配合消費券，以公共屋村商場為主、民坊旗下25個商場，推出「100%消費回贈優惠」，送出價值200萬元現金券，顧客以電子貨幣消費滿$50，即送$50餐飲現金券。活動期間，顧客於商場即日以電子貨幣累積消費滿50元或以上，憑最多兩張不同商戶的機印發票（最少一張由餐飲商戶發出），即有機會免費換領價值50元的餐飲商戶優惠券。有關優惠券為隨機附送，每日顧客每日憑每組有效發票只可換領一次。但要留意每個商場每日都有限額，送完即止。

MegaBox將於8月7日起推出多個消費券獎賞活動，顧客用不同嘅電子方法俾錢，都有唔同嘅回贈。如果係用八達通，消費滿$600，就有$50宜家家居現金券+$600商戶折扣券；其他電子方法俾錢，就要滿800蚊，得到$50宜家家居現金券+$800商戶折扣券；或者滿$1600，獲得$100宜家家居現金券+$1600商戶折扣券。另外，MegaBox Jetso eShop有多間人氣商戶現金券低至7折發售，例如IKEA、SINOMAX、荷花親子等，而且仲可以配合店內優惠一齊使用，盡享折上折優惠，之後再用消費券俾錢仲賺埋回贈，真係超抵呀！

銅鑼灣時代廣場由8月7日至31日，為Happy Rewards會員推出「Double Up Surprises」禮遇。該會會員由8月7日至20日，以電子消費滿$3000，就攞到$100 city super購物禮券，而8月21日至31日期間作出同樣消費，則可換領時代廣場英皇戲院電影禮券兩張。另外，於活動期間的四個周日內，即日以電子消費滿$8000，可換領香港海洋公園水上樂園成人門票2張。點解叫Double Up？其實時代廣場7月18日開始，已經有Happy Rewards 禮遇，即日以電子消費滿$1500就有一張$100購物優惠券、及150蚊嘅美食優惠券；消費每滿$5,000更可額外換領$500購物優惠券1張，逢星期四及星期日全日可享雙倍優惠券獎賞。