政府一月頭開始暫停晚市堂食，等咗三個月終於解禁，4月21日開始，大家夜晚可以出街食喇。小編同大家一樣，都已經餓咗好耐，所以即刻睇吓有乜平靚正嘅自助晚餐，結果搵到有7間做緊優惠，如果大家都想擦餐勁，就拿拿林去訂位啦！

一般自助晚餐可能只限任食兩個鐘，但六國酒店嘅Le Menu西餐廳，就俾到你食4個鐘，足夠你食完第一輪、回氣再食第二輪！今次主題叫「瀛春晚市放題X盛焰牛柳龍蝦雲丹燒」，安坐在寬敞舒適的Le Menu西餐廳，享受4小時任食放題，包括刺身、壽司、煮物、燒物、炸物、惹味串燒、天婦羅及甜品等美食，再加上一份無敵吸睛的主菜：盛焰牛柳x龍蝦雲丹燒已值回票價。飲品方面，Le Menu西餐廳無限量供應凍果汁、汽水，及每位贈送指定白酒乙杯。價錢方面，凡於3天前預訂並全數付款可享7折優惠，又或每四位同行，一位免費，但每日只限首20名顧客，而且不能與7折優惠一齊使用。

網址： http://www.gloucesterlukkwok.com.hk/special-offers/?lang=zh-hant
電話： 2866 2166

自從政府恢布晚市堂食，銅鑼灣Mr. Steak Buffet隨即宣佈，聞名的和牛自助餐終於回歸！晚市堂食4人同行1人免費，1至3人於晚餐早段可享低至7折，7點半後入座也有低至78折優惠。坊間少見和牛任食自助餐，所以Mr. Steak一向被視為超高CP值之選。自助餐內可嚐到澳洲和牛壽喜燒、 鐵板燒美國牛、日本和牛鐵板燒等，和牛各具特色，肉味亦十分濃郁，豐腴油香！除了和牛外，顧客亦必掃空運海鮮山，時令海鮮包括即開生蠔、長腳蟹蟹腳、開邊龍蝦、翡翠螺、紐西蘭青口、鮮蝦、藍青口等會輪流登場，一定食回回本價！仲有日式刺身壽司，如油甘魚、三文魚、立魚、及多種卷物奉上，甜品區不能錯過心太軟及多款蛋糕，飽到捧住個肚走。

網址： http://www.mrsteak.com.hk/#/zh/buffet/
電話：2881 5757

灣景國際灣景廳推出「蟹．花膠」自助晚餐，成人每位原價$548至$568，而家特價每位$468，並免付加一優惠價消費，總賬單滿$1,888，更可享82折優惠。食物有嚟自日本、泰國及越南的螃蟹與挪威花膠，匯合精緻細膩的烹煮技巧，令人再三回味。另有麵包蟹、新西蘭生蠔及藍青口等冰鎮海鮮源源供應，以海洋的鮮香味美躍動每一顆味蕾。仲有其他熱食菜式輪流提供：香煎鴨肝及羊扒、蜜糖芥末燒金門火腿、香草烤羊脾、燒美國西冷牛扒、北京片皮鴨、印度咖喱羊肉等，當然唔少得香港最鍾意的各式刺身，源源輪流奉上，包括三文魚、八爪魚、鯛魚、北海道帶子、希靈魚、甜蝦、北寄貝及吞拿魚等。

網址： https://www.theharbourview.com.hk/tc/offers/detail/165
電話：3909 9088

為迎接一班「餓狼」，港島海逸君綽酒店提早推出「和牛x鴨肝盛宴」自助晚餐快閃優惠，低至72折即每位548蚊，就食到和牛壽司、照燒和牛柳粒、鴨肝慕絲煙燻三文魚球、匈牙利式燉和牛肉、鴨肝慕絲煙燻鴨胸麵包卷、鴨胸肉鴨肝炒飯等，剩係食和牛同鴨肝，500幾蚊已經值回票價，對一眾牛魔王同鴨肝fans絕對吸引。其他美食包括：即開新鮮生蠔、白蝦、蟹腳、黃金螺、藍青口，仲有自助餐唔少得嘅刺身同天婦羅，食埋意大利芝士蛋糕、芒果拿破崙美式芝士蛋糕、什錦馬卡龍、班戟、12款Movenpick雪糕等甜品，一定食到飽一飽離場。但要留意，網站的「購買」鍵是灰色，就算你mouse over佢都唔會變色，你要留意右上角的購買車有冇顯示付款，如果有即係你已經成功買咗飛架啦。

網址：https://bit.ly/3EpB1Pp
電話：2121 2688

歷山酒店嘅歷山餐廳，係仿照維多利亞宮廷式設計風格，營造奢華雅緻嘅唯美空間，近年已經成為打卡熱點。而佢哋嘅自助晚餐，有冰鎮海鮮：即開新鮮生蠔, 蟹腳, 凍熟蝦, 小龍蝦, 藍青口, 海螺；現場烹調北京烤鴨同雜錦天婦羅；烤肉有慢燒特級肉眼牛扒、法式香草燒羊鞍；美味嘅壽司及刺身、多款中西亞洲凍盤及熱葷，同埋唔少得嘅甜品，包括：芒果拿破崙、麵包牛油布甸配雲喱嗱汁、紐約芝士餅、意大利芝士蛋糕、黑森林蛋糕、士多啤梨忌廉蛋糕、金柚香草奶凍、焦糖燉蛋、杞子桂花糕、哈根達斯雪糕等。而家有75折優惠，即係每位567，以假日嚟講呢個價錢都算平喇。另外，當月生日嘅食客可享半價、或奉送餐酒一瓶、一個精選生日蛋糕，但要有最少4位付費食客先有呢項著數。

網址：https://www.hotelalexandrahk.com/tc/offers/Weekend-Dinner-Buffet
電話：3893 2868

復活節就嚟時，W酒店曾經推出自助餐5折快閃優惠，唔知過咗4月21日又會唔會有呢？暫時未知，而家就做緊8折優惠，即每位低至668蚊，3個鐘嘅自助餐配無限飲指定汽水及果汁。佢地自助餐出名嘅有凍海鮮：法國生蠔、魚子醬、日本松葉蟹、多膏凍麵包蟹、新鮮龍蝦、翡翠螺等；熱海鮮有芝士焗蠔、薑蔥炒蟹、鮑魚XO醬炒飯、海鮮燒烤拼盤、蟹肉湯羹等，仲有威靈頓牛排、乳豬仔、羊架同埋大量壽司天婦羅，甜品仲有法式燉蛋、焦糖燉蛋、Movenpick雪糕呢！原來W酒店自助餐，喺Klook既銷售榜排名第二，睇嚟都好受歡迎喎。

網址：https://bit.ly/3voUiMP
電話：3717 2222

如果厭自助餐嚟嚟去去都係刺生燒肉，轉吓南歐風味又點睇？香港百樂酒店Park Cafe新推出｢拾味南歐｣ 海鮮自助晚餐，呈獻一系列歐洲南部嘅地道菜式，主打美食包括伊比利亞黑毛豬火腿、洋蔥芝士辣肉焗生蠔、意大利巴馬臣芝士伴黑松露意粉、西班牙蛤蜊辣肉腸海鮮酥皮湯、西班牙砂煲墨魚汁海鮮飯、西班牙風味烤雞、吉拿棒及瑞士MOVENPICK雪糕等，仲有無限供應果汁和啤酒供應。值得一讚係拎到自助晚餐優惠方法好簡單，讚好同追蹤佢哋嘅FB專頁就得，同埋記得入座時出示貼嚮FB專頁嘅優惠券。

網址：https://bit.ly/DinnerIsBack
電話：2731 2168