屯門因為有DONKI、壽司郎、MUJI等多間人氣名店進駐，已被網民譽為「香港No.1商場」，下個月仲有埋松本清，真係玩足一日都未必夠時間呀！但小編想講，其實屯門唔止得行街、食野，仲有全港首個空中運動場，佔地3.8萬呎，俾你盡情踩滑板、滾軸溜冰同埋平衡車，而且呢個場顏色鮮明，係一個唔錯嘅打卡點呀！

一般商場天台都係放吓冷氣槽、水缸、太陽板之類，至於屋村商場天台更有好多都係空置嘅，屯門愛定商場就係其中之一！咁大塊地方嘥咗就太可惜，所以某間私募基金管理公司，就斥資千萬港元，將呢塊原來係爛地，活化為佔地約11萬呎、有籃球場、足球場、跑步基地同埋滑輪運動場嘅空中運動場，俾居民舒展筋骨、操Fit體能。

呢個天台運動場嘅焦點就梗係空中滑輪運動場，佢佔地約3.8萬呎，分咗三層：低層係滾軸溜冰場，中層就係滑板場，而高層就俾小朋友踩平衡車。喺設計嘅過程中，聘請咗知名設計公司California Skatepark 做顧問，為中層滑板場提供專業嘅設計指導，應該唔會出現「滑滑吓飛咗落街點算」呢個情況嘅。另外，滑輪場採用咗專業物料，確保玩家可以喺型格嘅運動場上，安全地感受滑輪嘅樂趣。

另外，呢個場嘅顏色鮮艷奪目，又有賽車風格的格仔圖案，而牆身都噴咗同滑板有關嘅圖案、文字，鍾意打卡嘅人，到時問人借塊滑板，再擺番一個型格嘅板仔板女甫士，放上IG肯定呃爆Like啦！

場地未來將會陸續舉辦一系列精彩活動，包括運動體驗班、表演及遊戲攤位等，希望將滑板潮流帶入「屋」，下月18日舉辦免費滑板表演及體驗日，至於年底就有全港首個空中滑板祭，邀請各界滑板愛好者大展身手，大家想參加就要留意官方FB專頁喇。

空中運動場嘅焦點中嘅焦點，就係中層嘅滑板場！香港鍾意踩滑板嘅人唔少，但只能喺街嘅空地練習，感覺好「灰」，而家有一個油到靚一靚、又有足夠空位同幾個斜台俾板仔去練習，呢啲U型斜台有唔同高度，練到唔同花式，最重要係踩得好俾人睇到！

開放當日就請嚟兩度亞洲極限錦標賽滑板冠軍、職業滑板運動員陸俊彥示範，佢仲大讚呢個場：「好寬敞、好多空間俾板仔踩到，個人最鍾意係斜台，因為喺屋村入面，俾到佢好香港嘅感覺，同埋踩得好都俾人睇到！」同時佢都鼓勵滑板新手放膽去呢個場踩：「而家有好多滑板場，但新手會驚，因為太專業，而呢個場專業得嚟又帶點Chill，唔會俾你感覺焗促，你上嚟練習又得、hang out吓又得，好適合新手嚟接觸滑板。」

前往方法：搭輕鐵到安定站落車，再入愛定商場，沿路都有指示，行去D區見到黃色欄杆天橋，再直行就到。