而家日日都30幾度高溫，掛頸式冷氣機大受歡迎，因為你只需將佢哋掛頸，開機後等幾秒，就可以溫度急跌十幾度，成為新一代嘅消暑神器！不過市面上嘅掛頸式冷氣機，無論係價錢、降濕效果、續航能力都有分別，如果你揀錯，分分鐘得物無所用。小編就以三款時下幾熱門既掛頸式冷氣機做例子，教大家點楝啦。

首先介紹近排人氣旺盛嘅Sony REON POCKET 3，可能佢的的骰骰、外型又幾靚仔，所以受人注視啦，不過價錢都幾貴，官方訂價係$1499。佢沿用REON POCKET嘅袋裝設計同埋製冷/熱機制：搭載名為Peltier元件嘅半體模組，當電流通過，機身一邊變冷、另一邊就升溫，你選用冷氣功能，REON POCKET就以風扇排出熱嘅空氣，令你保持清涼。REON POCKET 3新增咗專用頸帶名叫Neckband 2，能夠調校角度以適合不同用戶需要，令到REON POCKET 3穩妥咁固定位置，你個身點郁都唔會移位外。同埋條繩夠幼，收埋喺恤衫領嘅下面都無人留意到，唔會破壞你嘅造型。

REON POCKET 3新加入兩個智能功能，一個叫SMART COOL MODE，能夠根據你的選擇，再因應用戶嘅動作或者環境，自動調節冷氣嘅勁度。另一樣智能叫自動開啟及停止功能，當你將佢掛頸，部機自動運作，你將佢放低喺枱面就識得停止運作，幫你慳番啲電。最後，REON POCKET 3應用新設計嘅發熱模組同埋散熱機制，電池續航力比上一代提高 2 倍、吸熱效能提高 1.5 倍。根據Sony嘅測試，Reon Pocket 3能為用家皮膚表面溫度降低攝氏13 度，而且係開機兩三秒即係感應到皮膚涼涼地，感覺好似你貼咗塊冰喺背部咁樣。

適合咩人用：小編覺得Sony REON POCKET 3都幾適合白領用，因為佢真係好似mouse咁細隻，放入衣領唔係好礙眼，唔會破壞咗返工嘅斯文Look。同埋佢冇內置風扇，所以開機後唔會發出大嘈音，根據香港格價網做嘅測試，將Sony REON POCKET 3校到最凍，嘈音大約係43分貝，同一般office嘅嘈音相若，即係你開著佢都唔會嘈到同事。最後，佢喺室外都用到個半鐘，如果你需要著住西裝外出，咁就夠你排隊等車、喺條街行嚟行去、或者食完飯返office都有得涼。不過佢嘅缺點係唔夠凍，若然你係長時間喺室外活動，例如行山、釣魚、BBQ等等，佢就俾唔到你「歎住冷氣」果種感覺。

如果話Sony REON POCKET 3就好似背部貼咗散熱散，咁Thanko Neck Cooler Slim就係將小型雪櫃掛喺條頸！佢外型有點似無線耳筒，頂部有舊電，上一代呢舊電係好易跌落，今次Neck Cooler Slim就加咗鎖扣，無論你點郁舊電都會扣死喺頂部。Thanko Neck Cooler Slim用咗小型雪櫃都有嘅帕爾帖效應—透過帕爾帖半導體製冷，開機2秒就開始降溫，根據廠方數據，最多可以降溫高達17度，而上一代只係15度。佢有三種使用模式去迎合不同降溫程度，亦可以交替出現避免你條頸出現麻痺感覺。Thanko Neck Cooler Slim重過Sony REON POCKET 3少少，連埋舊電都有200g左右，不過佢摺得埋，方便你塞入手袋或者背包。左右兩邊可以拉長，同埋裝咗彈弓，外型比上一代更貼切人體工學設計，完美貼服頸部，而且左右機身都有冷卻板，等你條頸嘅兩邊大動脈，都被呢個「小型雪櫃」鎮住，達到好快就令人涼快效果。

Thanko Neck Cooler Slim配備2000mAh 高容量電池，根據廠方測試，校到最強冷氣係可以用到一個鐘，你想用耐啲就要插住「尿袋」喇。另外佢舊電可以拆出嚟叉電，或者你買多一、兩舊電，咁就可以一舊拎去叉電、又可以繼續用到Thanko Neck Cooler Slim。不過又咁睇，上一代唔駛要電池，部機直接插住電都用到，好適合喺室內長時間用；另外上一代嘅冷凍板係大過Thanko Neck Cooler Slim，而冷凍板愈大就愈多皮膚「歎到」冷氣，所以用Thanko Neck Cooler Slim，你就要將Thanko Neck Cooler Slim對準條頸嘅大動脈喇。最後，有一個都幾得意嘅測試，小編想同大家分享: 有一個Youtuber將小水點，滴喺Thanko Neck Cooler Slim兩塊冷卻板，等大約6分鐘，竟然開始凝結、好似冰塊嘅初步形態咁，證明Thanko Neck Cooler Slim真係好似小型雪櫃咁啊！

適合咩人用：Thanko Neck Cooler Slim雖然大部過又重過REON POCKET 3少少，但掛上頸都唔算太大負擔，同埋佢可以一、兩個鐘咁凍住條頸，所以幾啱行住街咁用，又或者行書展，就算拎住一袋兩袋都唔驚身水身汗。另一個用途係運動完，你想即刻凍一凍，以前你要用水照頭淋，而家可以用Thanko Neck Cooler Slim，掛喺條頸等四、五秒就感覺到冰凍，等身體感覺舒服番啲，又可以再繼續做運動。最後，佢售價算係大眾化，街價425蚊至498蚊，如果你第一次買呢類掛頸式冷氣，可以試吓呢部Thanko Neck Cooler Slim，感覺有幫助咪繼續用落去囉。

夏天雖然係熱，但又好好天，咁都少不免有戶外活動，例如行山、釣魚、出去影相或者船P等，點樣可以比較舒服地曬太陽呢？TORRAS Coolify L3 Pro就幫到你啦！佢同其他兩隻掛頸冷氣最唔同之處，係佢內置咗好強勁嘅風扇，製冷之後可以對住你個頭吹出冷氣，感覺就好似你個頭同熱辣辣嘅環境隔開咗！佢係用Ku Peltier散熱器進行半導體製冷，加上3D Airflow專利設計，廠商話1秒鐘就能夠將你嘅體溫降低12度！雙排氣口設計，使用36個排氣口，將空氣吹遍整個頸部：向下的通風孔可防止頸部出汗，而向上的通風孔可幫助你更好地呼吸並保持成個頭都清涼。另外佢係無刀片設計，唔會攝入頭髮，為長髮女士、小朋友或老年人提供額外嘅安全感。

不過佢嘅缺點都唔少，首先係對比Sony及Thanko，TORRAS算係幾重，有340g，加上風扇放喺機嘅前端，長時間掛喺頸就有贅住嘅感覺。另一個缺點亦同風扇有關，就係嘈音好勁，開到最涼嘅mode嘈音超過60分貝，如果返工用，相信會嘈到隔離位嘅同事了。最後係佢唔可以叉住電用，而內置電池係4000mAh容量，開著最強勁嘅風扇加製冷都夠用兩小時，之後想再用，就要充電2.5小時喇。

適合咩人用：正如前文所講，戶外活動出勁多汗，最適就係用TORRAS Coolify L3 Pro降吓溫，一來佢夠凍加上吹風夠均勻，就算烈日當空，你都唔會覺得熱。或者你會話：粒電用得兩個鐘唔夠喎？唔驚，因為部機製冷模式工作30分鐘後，將自動關閉，你可以用風扇模式吹住先，若然真係熱到頂唔住咪用番製冷囉，咁都捱到幾個鐘嘅！另一批啱用嘅人，就係好容易出到一身汗嘅人，例如你食完飯跟住返公司，即使短短十幾分鐘路程都攪到成身汗，咁用佢凍一凍體溫，就唔驚汗臭到其他同事啊。