IKEA佛跳牆好唔好食 ？宜家佛跳牆有無聽過？係呀，佢係有出佛跳牆㗎！小編最近有同事買咗個試，大讚抵食好食。只係睇佢拍條片，都見鮑汁夠濃，板栗夠甜，瑤柱入味，見到都想食。想知宜家佛跳牆幾錢盒？點煮？抵唔抵食？立即睇文啦！

IKEA佛跳牆食材價錢購買方法資料

IKEA佛跳牆食評：劣食變美食

其實宜家（IKEA）喺2021年嘅農曆年，都出過佛跳牆，仲可以堂食，不過劣評如潮！例如當時用料得冬菇、魚蛋、芋頭同腩肉，同埋一塊龍脷加片海參，可以話同佛跳牆完全冇關！

至於味道就更係「12級伏」，材料同湯零交流，被網民笑指：「去瑞典餐廳點中菜的必然結果」。可能因為舊作太差，所以今次宜家急凍鮑汁佛跳牆，無論用料同湯都有極大改善。

IKEA佛跳牆好唔好食？用乜材料？

先講用料：佢有瑤柱、蠔油、海參、花膠、鮑魚、鴨掌、板栗、冬菇等，冇翅都仲有鮑參肚，總算稱得上佛跳牆。

而且鮑魚海參都唔係細條，海參有半支筷子咁長，鮑魚亦唔係「斗零鮑」，同埋發好晒、炆好晒，慳番好多煮嘅時間。另外由湯變成嘅鮑汁，係由水+雞肉+雞腳+豬骨+豬皮+鮑魚+火腿煮成，應該唔會同上一個版本「湯同料完全唔夾」。

宜家急凍鮑汁佛跳牆煮法

因為宜家急凍鮑汁佛跳牆係熟哂、發好晒、調味好晒、仲煮埋鮑汁俾你，所以煮法好簡單，就係成包倒落個煲，整熱佢就食得！咁當然因為急凍過，你都要解凍咗先煮得。想要好味啲，仲可以預備定生菜白飯，等佛跳牆一熱就淋埋落去一齊食，飽肚又唔膩。

IKEA急凍鮑汁佛跳牆價錢

宜家急凍鮑汁佛跳牆分一人分量裝及家庭分量裝，後者就係乜嘢配料都係前者ｘ４，例如4條海參、4隻鮑。一人分量裝就賣＄83，家庭裝賣＄309。

如果你係4個人食，就梗係買家庭裝抵過買4包一人裝。但留意，急凍鮑汁佛跳牆只限宜家門市有售，網店係冇。另外，門市擺咗「陳列品」，俾顧客睇到有咩料同幾多分量，你可以因應個人胃口去決定買細定買大。

IKEA佛跳牆好唔好食：抵食易煮送禮佳

總結嚟講，宜家佛跳牆都有4個好處：

1.宜家佛跳牆抵食 性價比高

先講價錢，83蚊有咁足料嘅佛跳牆已經好吸引，去酒樓食肯定收你過百蚊盅！

2.IKEA佛跳牆易煮  加熱食得

第二係懶得煮！鮑魚、海參、魚肚等材料，喺未煮之前都要花好多時間處理（例如發一條海參就要攪幾日），如果你係新手就更加難攪！IKEA佛跳牆，買番嚟，倒落窩，加熱就食得，方便程度好似淥個公仔麵咁。

3.探朋友House warming 送禮佳品

第三係上朋友屋企開Party，唔想帶梳蕉上去又諗唔到買乜，IKEA急凍鮑汁佛跳牆家庭分量裝就幫到你，因為佢外表成個禮盒咁，仲有條繩方便你拎。講開Packing，哩個急凍鮑汁佛跳牆係抽真空，然後用膠盒或發泡膠包住，所以能夠保持冰凍一段時間，你買完再上朋友屋企，都唔驚佢變壞。

4.食完佛跳牆 鮑汁即變打邊爐湯底

最後，如果你一個人，懶得自己煮，耐唔耐食餐好，當獎勵自己都唔錯呀。而且食完嘅汁，仲可以做打邊爐湯底。

傳統佛跳牆煮法教學

自己想試吓煮佛跳牆？以下製作步驟，不妨參考吓：
● 步驟一：預備食材，包括刺參、花膠、鮑魚、鹿筋、冬菇、雞、瑤柱及金華火腿；
● 步驟二：預備湯底，材料則需要瘦肉、雞腳及水，配料飛水後，再煲一至兩小時即可；
● 步驟三：鹿筋先焗水。水滾就放入鹿筋，然後熄火， 等一晚睇吓鹿筋變軟未，如果仲硬，就用慢火再焗陣，直至變軟；
● 步驟四：刺參焗水兩日左右，然後清理內臟；
● 步驟五：花膠要焗水兩日，雞汆水；
● 步驟六：等湯滾期間，切好花膠、刺參、雞等再汆水，然後放入燉盅；
● 步驟七：先落鹿筋，因為佢最難炆淋，用雞蓋住佢，再放入其他配料；
● 步驟八：花膠唔好落住，否則會溶晒；
● 步驟九：倒湯入燉盅，冚蓋後鋪上保鮮紙，放入鍋燉3.5小時；
● 步驟十：再放花膠，鋪上保鮮紙後燉多半個鐘，完成！

如果你想最近香港有甚麼好玩，可以click入來看小編更多介紹！