透心涼甜品健康又美味 親子食譜同小朋友DIY夏日消暑甜品
夏日親子消暑甜品食譜丨暑假來到一半，去旅行、暑假活動都進行得七七八八，家長還準備了什麼活動給子女們「放電」呢？最近香港天氣持續酷熱，不想在外「大汗𢱕細汗」，不如留在家中，與子女享受親子時光，合力炮製夏日消暑甜品對抗炎夏。好分享為大家推介五款透心涼甜品，健康又美味，做法簡單，最適合家長陪同小朋友一同發揮創意DIY製作。
夏日親子消暑甜品食譜 1. 香濃芒果椰汁奶凍
食甜品好多人都諗起芒果，貪佢有一股濃郁香氣，七月街市超市有最靚當造嘅台灣愛文芒果同金煌芒果，日本就有宮崎芒，隻隻酸甜香口，用嚟做夏日消暑甜品最啱。加上芒果向來有「熱帶水果之王」美譽，含有豐富維他命 A、維他命 C 同鉀，小朋友食幾杯香芒椰奶凍都唔怕！
材料：
- 牛奶 400g
- 椰漿 210g
- 鮮奶油 35g
- 魚膠片 13g
- 糖 30g
- 芒果 1-2個
- 椰絲 適量
做法：
- 魚膠片泡涼水浸軟備用。
- 將椰奶凍材料倒入大碗中拌勻後倒入鍋裏小火煮至溫熱，再關火放入已經泡軟的魚膠片，待完全溶化後放一旁冷卻。
- 將椰奶倒入布丁杯中然後蓋上蓋子放入雪櫃冷藏一晚。
- 預備一個大芒果起肉然後放在已經凝固的椰奶凍面，再灑一點椰絲就完成。
夏日親子消暑甜品食譜 2. 鮮果乳酪雪條
小朋友要食得有營？好多家長都會以乳酪取代雪糕，原因係乳酪能提供益生菌，有助增強孩子嘅抵抗力同保持腸道健康。用乳酪嚟整鮮果乳酪雪條就最啱，藍莓有助眼睛視力保健，奇異果營養價值高，士多啤梨酸中帶甜，開胃可口，再加入蘋果汁在乳酪中，容易入口亦唔會過甜，反覆有酸酸甜甜嘅感覺，小朋友唔怕因為食生冷嘢會咳，仲好健康，日日一支都冇問題！
材料：
- 純味乳酪 1杯
- 蘋果汁 1杯
- 蜜糖 1湯匙
- 藍莓 1/2杯
- 士多啤梨 3粒
- 奇異果 半個
做法：
- 把藍莓和奇異果洗淨，奇異果切片，士多啤梨去蒂後切粒。
- 乳酪加入蘋果汁及蜜糖後拌勻，把藍莓、奇異果及士多啤梨放入雪條模中。
- 最後把拌好的乳酪放在雪條模內，放入冰格約四小時完成。
夏日親子消暑甜品食譜 3. 蜜糖木糠布甸
好多小朋友都鍾意食布甸，蜜糖木糠布甸簡單易整，如果有疫情食剩嘅消化餅，雪櫃又有淡忌廉，已經可以整到美味蜜糖嘅蜜糖木糠布甸，冷藏兩小時或以上即可享用，奶香幼滑，冰凍可口，保證囝女有零失敗入廚體驗。
材料：
- 消化餅 5塊
- 淡忌廉 180克
- 煉奶 10克
- 蜜糖 2湯匙
做法：
- 將消化餅放進保鮮袋，盡量壓碎。
- 將煉奶和淡忌廉混合，打發至約七成企身。
- 取出少量忌廉混合物，與蜜糖輕輕拌勻。
- 把拌勻的混合物倒進剩餘的忌廉中，再輕輕拌勻。
- 將忌廉及消化餅碎逐層放入小杯中，冷藏兩小時或以上即可。
夏日親子消暑甜品食譜 4. 迷你一口泡芙
迷你一口泡芙，中間唧入忌廉，放落雪櫃，食嘅時候稍為放軟，食落裡面似雪糕，簡單易整又係一個方便小食，小朋友一粒一啖，食到停唔到手！
材料：
- 水 250g
- 低筋粉 175g
- 無鹽牛油 120g
- 全蛋 5隻
做法：
- 先將水及牛油放入煲內煮至牛油完全溶化微滾就可以(小火)。
- 放入已篩麵粉拌勻(其間不用關火)。
- 拌勻後略煮大約3分鐘，要不停攪拌。
- 熄火，放至微暖始開始放蛋(太熱蛋會熟) 蛋要續隻放入，每入一隻蛋都要快手拌至均勻。
- 入好蛋後就可以入唧袋，每粉唧約 3cm，放入已預熱焗爐 200 度，焗 15-20 分鐘就可以。
- 完成後泡芙取出放涼，底部拮一小孔方便唧入忌廉，雪 2-3小時便可。
夏日親子消暑甜品食譜 5. 士多啤梨乳酪沙冰
夏日炎炎，唔想小朋友飲咁多汔水？盒裝果汁又怕太甜？不如自己整士多啤梨乳酪沙冰，呢款特飲以士多啤梨為主，士多啤梨有豐富維他命 C，可以增強抵抗力，保持身體健康。
材料：
- 士多啤梨 100克
- 橙一個 / 橙汁 150毫升
- 乳酪 100克
- 亞麻籽 一湯匙
做法：
- 士多啤梨在水中洗乾淨。，再加入一茶匙白醋，在水中浸10分鐘。
- 將士多啤梨的水份抹乾，放入冰箱冷藏大約5小時，直至結冰。
- 搾橙汁，或可用現成橙汁代替。
- 將士多啤梨柄去掉。
- 將所有材料放入攪拌機，打至順滑，即可飲用。
