生產攻略 揀中文大學醫學院生BB呢啲一定要知!

私家生BB好多選擇，中文大學醫院上年先開業，好多準媽媽都有興趣了解吓，因為好新，設備新、大樓設計似酒店，地點亦算方便；但同樣因為新，無咩人去過、更無咩ＫＯＬ去過呢度生，提供俾準媽媽參考嘅軟性資料更加少，今日就等小編同你地自費實戰一次，想了解喺中大醫院生嘅準媽媽一定要睇落去！亦好歡迎留言問~~

 

一定要知之一） BB跟床定喺育嬰室?

小編認為，中大醫院最大優點係媽媽可以隨時按鈴請姑娘推BB到床邊，或者送BB返去育嬰室。有人嚟探BB就可以直接接觸到BB，唔駛隔住塊玻璃，或者只有某一、兩小時先可以抱到BB。

不過注意返，疫情下中大醫院對探訪者嘅要求都比較高，必須做核酸測試，唔認可快測結果。另外，都好建議探訪者抱BB要著保護衣，PS:保護衣要另外收費。

 

一定要知之二) 病房設備好嗎?

先講間房，因為最多2人一間，整體感覺都幾闊落，床同床中間大部份有玻璃擋隔，相對布簾會較為隔音，因為生產完第一晚會有輔助儀器，都幾嘈，自己好攰又有止痛藥之下會瞓到，隔音較好就唔駛嘈到同房。

房內設施如沖涼設施、馬桶、病床都幾好，尤其成間房嘅燈光偏柔和，好適合影到靚相。

不過，小編床位上面盞燈時著時唔著，因為小編喺醫院都唔駛好光，就無要求換床。所以話，新都唔一定所有設備都完善架其實。

 

一定要知之三) 環境靚? 

如果瞓窗邊，窗外環境都幾靚，望住中文大學，有草地有教堂。出院時，姑娘都好鼓勵你影吓相打吓卡，大家可以睇吓唔同窗景。

不過如果唔係瞓窗邊，其實個view 靚唔靚就唔關事喇，都係得個床位。都叫闊落嘅。

一定要知之四) 姑娘好唔好?

接生嘅醫生小編一早揀定係平時產檢嗰個，所以唔知中大醫院本身嘅住院醫生質素，但係醫院嘅姑娘、助理就好貼身咁體驗過。結論係：好細心。

小編本身係開刀（剖腹生產），傷口處理要非常小心，喺住院嗰幾日，姑娘同助理喺抹身、去洗手間、飲水等都照顧周到，而且一按鐘基本上1X秒就會有人入到嚟床邊，非常有效率。(小編隔離床位嘅媽媽疑似有非常大嘅情感需求，姑娘對佢嘅服務更加體貼，會好主動咁關心佢而家嘅感受係點。)

一定要知之五) 餵奶方式

喺中大醫院可以揀埋身或者水奶，水奶要自費，姑娘會幫你餵埋，佢地嘅方式係用匙或者針筒，唔用奶樽係為防BB產生乳頭混亂。

至於埋身，到時間或者BB喊就會推BB過黎床邊俾媽媽，等媽媽可以喺床上餵，姑娘仲會詳細咁教點餵奶、上奶手法等。而小編就選擇咗，試埋身，BB唔夠就補水奶，覺得咁最無壓力。

一定要知之六) 餐飲好唔好食? 

一般叫餐都係用點餐螢幕，餐飲講真，都好一般，有基本嘅中西式早餐、正餐等，選擇唔多，味道都好一般，優點可能係唔會多油多鹽而已。

整體嚟講，今次住院經驗都幾唔錯，令到小編之後返到屋企坐月都覺得，住醫院嗰幾日都幾爽。