淨係食過呂宋、愛文芒? 蜜雪芒、太陽之子等大熱芒果你食過未?

芒果香港人由細食到大，不過以前市面上通常得菲律賓嘅呂宋芒、泰國嘅水仙芒同埋台灣嘅蘋果芒，而家芒果五花八門，農民喺以上品種嘅基礎上培植出各式改良品種，就等小編用文字帶大家全部食一次啦！

台灣：夏雪芒

大名鼎鼎嘅夏雪芒，係台灣第一粒擁有注冊專利嘅芒果，由高雄農改場喺1986年培育而成，又名「高雄3號」！「夏雪芒」以土芒果為母本，果型中等，散發土芒果香氣，同時又有金煌芒果甜度與愛文口感，果肉多且核細，香味濃郁，被世人譽為「芒果界的LV」！

售價：約45至50元／個（小）、約80元／個（大）

台灣：蜜雪芒

又名高雄四號嘅蜜雪芒，係夏雪芒同愛文芒嘅混種，擁有橘黃帶點粉嘅色澤，蒂頭處會有淡淡清果香，品嘗起來甜而不膩、果肉軟滑飽滿，獲稱為”芒果界之愛馬仕”。外形似愛文芒，食落似夏雪芒，但比夏雪無咁多自然纖維（都有少少渣），整體嚟講紮實綿密、甜度適中，更帶有花蜜香味添！

售價：約60至80元／個

台灣：愛文芒

愛文芒原產於美國佛羅里達州引進，引入台灣後因水土不同，又同台灣土芒果混種，而產生而家嘅台灣愛文芒。其香氣濃郁及口感滑順，果型飽滿、顏色紅艷、甜而不膩，口感Q彈、因而最受港人喜愛，係台灣最廣泛種植嘅品種。

售價：約20、30元／個

台灣：凱特芒

有「九月芒果」之稱嘅凱特芒，9月先熟成，係台灣最晚熟嘅品種，都係由美國佛羅里達州引進。果實大而圓，果肉橙黃、肉質較扎實，最特別嘅地方係甜中帶酸！

日本：太陽之子

太陽之子嚟自日本宮崎縣，有「芒果女王」之稱，因為佢產量稀少，每棵果樹只能產出幾粒芒果，每粒都經過嚴格挑選，果皮印有獨一無二嘅編號同埋標簽，包裝仲附上詳細種植與級別說明，身價矜貴。太陽之子每個重量為350公克以上，果皮一半以上為鮮紅色，甜度偏高，先清甜後香味濃郁，且清醇順喉，口感層次豐富。

售價：普通版約400元／個

柬埔寨：白花芒

近年人氣急升嘅柬埔寨白花芒，已獲得柬埔寨王室認可，晉升為該國貢品級芒果，非常厲害！由於柬埔寨屬於內陸盆地，平原地區令日夜溫差較大，所以芒果結糖量高（糖度達18至20度）。而且芒果充分吸收陽光，確保肉香汁甜，仲帶有白花清香，據講係天然有機種植添！

售價：約30、40元／個

泰國：水仙芒

泰國水仙芒名叫水仙，皆因獨特香氣，外皮光滑、食落清甜，普遍糖度達16至18度；後勁帶有微酸，味道平衡，唯獨水分不多。一年四季都有供應，常用於製作芒果糯米飯。

售價：約30、40元／個

菲律賓：呂宋芒

呂宋芒嚟自菲律賓，相比台灣嘅芒果，佢果形偏細，勝在果核夠薄，香味濃郁，甜度偏高，果肉滑溜無渣，而且價錢最經濟實惠添！加上全年都有供應，本地大部份甜品店都會用佢嚟製作甜品，令小編諗起細個有間由做本地人生意到改為主打遊客嘅已結業芒果甜品店添！（大家知我講邊間嘛？）

價錢：約$15／個